La Liga: Getafe 1-2 Barcelona, Real Madrid 0-2 Real Sociedad

Kum thara league an khelh hmasak berah Barcelona-in Getafe tlawhin 2-1 in an chak a, Real Madrid erawh an mikhual Real Sociedad lakah si hnih faiin an tlawm.

Chawlhniah Barca-in an khel a, minute 20-ah Lionel Messi chuan angle te tak atangin a khung a, La Liga goal 399 a tihluhna niin league kal mekah vawi 16 a khungna a ni nghal bawk.

Minute 19 hnuah Luis Suarez chuan mikhual tan thun ve lehin a pet lut a, tun season-ah vawi 12 a tihluhna a ni a, league kal meka Messi nen an goal khung belhkhawmin an elpui team 16 aiin an thun hnem zawk a ni.

Chawlhlawk hma minute hnihah Getafe tan Jaime Mata chuan beiseina siamsakin an si phurh a sut then a, mahse, hun tawp thlengin goal dang a luh belh lo.

Hnehna an chan rualin Barca-in hma an hruai fal nghal a, league khelh 18-ah point 40 hmuin pahnihna Atletico Madrid aiin point ngain an sang a, Atletico hian pathumna Sevilla tlawhin 1-1 in an inhnehtawk a ni.

Real Madrid-in harsatna lian tal an tawk a, Santiago Bernabeu-ah mikhual Sociedad-in an barakhaih.

Minute thumah Real player Casemiro chuan penalty chawiin Willian Jose chuan a chhuih lut a, mualneitu team-in bei let nasa hle mah se an si phurh an sut thei lo.

Darkar khat an inkhelh hnu lawkah Real forward Lucaz Vazquez chuan red card a chawi a, si an phurh bakah player pakhata tlem zawk ni chungin an khel tluan a, si khat an chhuah belh.

Hun pangngai tawp hma minute sarihah Ruben Pardo chuan a tauh lut a, Sociedad tan hnehna hlu tak niin tun kum 15 chhunga Bernabeu-a La Liga an khelh tawhah an chak vawi khatna a ni a, league an khelh hnuhnun vawi liah tlawm vekin rin loh takin Real hmaah point thum an thawk chhuak a, 11-naah an inhlangkai.

Palina atangin panganaah Real an tlahniam ve thung a, point 30 kawlin palina Alaves aiin point khatin an hniam a, hmahruaitu Barsa nena an inkarah point 10 a awm.

December khan Club World Cup an khel a, hei vang hian league an khelh hun sawn hlat a ni a, kuminah league khelh hnih hmachhawn tawhin hnehna an chang zo lo ve ve a ni.

Share post:
avatar
  Subscribe  
Notify of