Kumin inthlanah eptu MLA-te tling nawn tur an awm lo : Zodintluanga

Kumin inthlanah eptu MLA-te tling nawn tur an awm lo : Zodintluanga

LUNGLEN BUREAU
Aizawl, August 17, 2018
Lunglei South bial khaw hrang hrang tlawh mektu, Congress Legislature Party (CLP) Treasurer leh Minister ni bawk, Zodintluanga chuan Thualthu-a vantlang inkhawm neihnaah thu sawiin tuna eptu MLA ni lai mekte chu kum 2018 inthlanah tling nawn tur an awm tawh loh thu a sawi.

Aizawl West II bial chungchang sawiin, “Kum 2008 inthlanah party mala dingin MNF 3-na an ni a, PC candidate Brig . Sailo hneh taka tlingin kum 2013-ah MNF leh MPC chu thawkhovin Congress candidate hnawhsarum taka an dah chu party pahnih thain a hneh tawk chauh a ni,” tiin Zodintluanga chuan a sawi a. “Tunah chuan MNF hi an mal din ve mai dawn bakah ZPM an awm tawh bawka MLA ni lai hian chance a nei lo reng reng a ni,” a ti bawk.

Siaha bial chungchang sawiin, “Siaha lam en ila, kum 2013 khan MNF leh an tualchhung party lian, MDF an tangkawp a, tunah chuan MDF chu BJP-ah an inlet tawh a, Mara ramah MNF hian vote an hmu tam ngai lo va, he bialah pawh hian MNF MLA ni lai tan hian tlin leh theihna tur a awm lo,” CLP Treasurer chuan a ti bawk.

Congress Minister chuan Tuikum bialah pawh MNF leh MPC tangkawp khan Congress party block chhunga buaina awm chungin vote 14 chauhvin chakna a chang tih sawiin, “An mal din phei chuan chance an nei lo nasa hle dawn a ni,” a ti bawk.

Zodintluanga chuan Congress party chu ram pumah nasa takin hma sawn chho zelin MNF hun laia tihchhiat tawh development project siam that leh tam tak chuan mipui rilru a hneh ngei a beisei thu a sawi a. “Falkawn Referral Hospital pawh MIMER dinin doctor zir theihna hiala puitlin a ni tawh a, Tuirial HEP pawh Prime Minister-in a rawn hawng hial a ni,” a ti bawk.

LAD Minister P.C.Lalthanliana pawhin thu sawiin, “Ram pumah kan boruak a tha a. Zoram politics-ah sorkar tur reng reng chhim lam atangin a lang zel a. Sorkarna term thum siam turin kan hotute hi Pathianin mal a sawm tlat, a chhan chu mi rethei hlamchhiah miah lo sorkar a nih vang a ni,” tiin mi rethei thil petu chuan Pathian a puktir thu a sawi.

“An SEDP hi anmahni MNF takngial pawh hian an zuar peih tawh lo a, an ring lo reng reng a ni,” PC Lalthanliana chuan a ti bawk.

Zodintluanga, P.C.Lalthanliana leh Lunglei District Congress Committee hruaitute hian S.Laldingliana bial, Lunglei South khaw hrang hrang Thaizawl/Bualte, Thualthu, Tawipui North, Tawipui South leh Thingfal te an tlawh a, vantlang inkhawm an neihpui vek a ni.

Share post:
avatar
  Subscribe  
Notify of