Kum thar a vawi khat nan Real Madrid-in chak an tum

Kum thar a vawi khat nan Real Madrid-in chak an tum

LUNGLEN SPORTS
Real Madrid-in kum thara a vawi khat nan chak ngei tumin La Liga an khel dawn a, chawlhni zan lai pelh dar 1:15 atangin Real Betis-in an mikhual ang.

Real-in kum tharah league vawi hnih khel tawhin an che chhe hle a, Real Sociedad lakah tlawmin Villarreal nen an inhnehtawk bawk. League table-ah palina atangin panganaah an tlahniam a, Betis khelmualah point thum an thawk chhuak zo lo leh a nih chuan season thara Champions League khel turin an hmabak a haktak zui thei viau dawn a ni.

Nilaini khan Copa del Rey-ah Real-in si thum faiin Leganes an hneh a, hei hian league an khelh zui turah inrintawkna a siamsak a, Leganes an hneh tumin kum 18 mi Vinicius Junior a che tha hle a ni.

Tun season-ah Real an talbuai viau a, kum thum a zawna Champions League trophy lakpuitu Zinedine Zidane chuan season tan hmain coach a nihna a chawlhsan a, nipui bazar hun laiin Juventus-in star player Cristiano Ronaldo an lei bawk.

Spanish Julen Lapotegui ruaiin season thar an hmang a, league khelh 10 kaihruai hmanin point 14 chiah an hmu a, manager atangin an ban.

Real ‘B’ team enkawltu Santiago Scolari an ruai zui a, a hnuaiah hmasawn hret mah se league an khelh hnuhnunah an tlahniam leh a, vawi 18 theuh an khelh tawhah point 30 an hmuh laiin hmahruaitu Barcelona aiin point 10-in an hniam a ni.

Barsa-in league title humhim turin rahbi an tuk ve thuk a, pahnihna Atletico Madrid nen an inkarah point nga awmin chawlhni zan dar 11-ah Eibar mikhualin an khel ve thung ang.

Share post:
avatar
  Subscribe  
Notify of