KOLASIB DISTRICT BAWRHSAP THUPEK KHA

KOLASIB DISTRICT BAWRHSAP THUPEK KHA
Representational Image only

HC.Vanlalruata, Principal Correspondent, PTI

Kolasib District Bawrhsap Pu Arun T hian a ti leh ta. Kolasib bawrhsap hna a zawm atanga rei lote-ah thupek a chhuah a. He a thupek chhuah hi District Magistrate a nihna a a chhuah a ni a, Criminal Procedure Code (CrPC) section 133 tlawhchhana a thuchhuah hi a khauh fu mai a. Thupek hi PWD Executive Engineer, Highway Division-5, Kolasib Division leh Sunshine Overseas Pvt. Ltd., Dr Thanpuii Building, Tuikhuahtlang, Aizawl hnena pek a ni a. A thu tlangpui chu hetiang hi a ni:- “Kolasib district tan tlang leh Mizoram kawngpui pawimawh ber zing ami National Highway 54-na chu state dang atanga Mizoram chhunga mipui nitin mamawh phurh tlang rengna kawng pawimawh a nih bakah zinmi tam tak phurhna kawng leh lirthei chi hrang hrang an tlan rengna a ni a. Lirthei za telin chhun zan zawma an hman rim em em kawngpui a ni. He lai kawng, a bik takin Vairengte leh Bilkhawthlir inkar leh Kolasib leh Kawnpui inkar hi a chhe zual hle a. Kawng khuar a tam em em a, tunah pawh a la awm reng hlawm.

“Heti khawpa kawngpui a chhe chung hian tulna avangin lirthei hi a kal lo thei chuang si lova. Lirthei thenkhat chu kawngah hian tangin harsatna namen lo an tawk thin a. Hetiang hi a dinhmun a nih avangin chetsual theih reng a ni a, lirthei chhia mai ni lo mihring tana hrehawmna leh rilru natna thlen thei a ni a, mihring nunna hlu tak chan phah theih a ni bawk. Hetianga kawngpui a chhe lutuk chung chung hian lirthei a tlan lo thei chuang si lova, hei hian mipui harsatna namen lo a siam sak reng a, a siam chho reng dawn bawk. Chuvangin helai kawngpui chhe lutuk hi Indian Penal Code (IPC) section 264 in a sawi mipui tana hnawksak leh chimawm (public nuisance) a ni ngei tih hi ka pawm dan a ni.

“Kei, Arun T. IAS, Kolasib district a District Magistrate hian helai kawng hi enkawl tha a kawng khuar awm lova August ni 20 ral hma a siamtha turin ka hriattir che u a, August ni 6 hian District Magistrate court hmaah inlanin he thupek hi tihpuitlin a nih theih dawn leh dawn loh chungchang sawifiah tur a ni a. In inlan lo a nih chuan he thupek hi zawm ngei ngei tura tih a ni ang,” tiin.

Hmanni lawk khan helai kawngpui-ah hian kan kal ve a, Aizawl lam atanga kala Buichali lei pelh phei hnu lam chu chhe tak a ni a, car khan hniam deuh chu kawng khuar leh pawngah inrep theihna a tam hle a. Kan hma a kal SUV pawh a insawh kawi nual a. Kolasib district huam chhung a nih ve loh avangin bawrhsap hian a ziak lang ve lo mai niin a lang. Kan ram kawngpui pawimawh ber saptawng taka ‘lifeline’ an tih mai, kan eitur leh nitin mamawh kan lakluhna kawngpui ber heti khawpa a chhe mai hi ngaihtuah chian a ngai khawp mai. Thingtlang chhuntu kawng dang tam ber chhiat dan tur chu ngaihtuah ngam pawh a ni lo zawk a nih hi.

KOLASIB DISTRICT BAWRHSAP THUPEK KHA 1

Kan hre vek. Mizoram chhungah hian eng engemaw chu thar chhuak ve mah ila, kan mamawh za zela 90 vel hi kan state pawn atanga kan chawk luh a la ngai a. Chumi kan chawk luhna kawng pawimawh ber ber chu Silchar leh Aizawl inkar kawng, a hmalama kan sawi mek khi a ni a. Silchar leh Aizawl inkara hnamdangin kawngpui an dan chah vaih chuan rei lote chhungin buhfai leh nitin mamawh dang dang, chawhmeh, petrol leh diesel bakah eirawngbawlna gas thlengin kan tlachham nghal titih mai tih chu kan hre vek. Hnamdangin kawngpui an dan chah pawh ngai lovin he kawngpui pawimawh lutuk hi enkawl that a nih loh avangin harsatna kan tawk zing ta hle mai a. Mawhphurtu erawh chu an awm ngai meuh thung lo.

Hetianga Kolasib bawrhsapin dan tlawhchhana thupek a chhuah a, a mawhphurtute a court hmaa a koh ngai ta hial hi engti’anga ngaih a pawm tur nge ni ta ang le? Thenkhat chuan kan ram hi a neitu, leilung fate hian kan hmangaih tawk lova, ram hruaitute ngei pawhin a taka mipui hmakhaw ngaia an rawngbawl sak ai chuan mahni pum puarna leh hlawkna ringawt an ngaihtuah a ni an ti mai thei. Thenkhat chuan kan Mizo officer te aiin hnamdangte hi an tha zawk daih a nih hi an ti mai thei bawk. Engpawh chu nise kan kawngpui kan enkawl that loh kawngah hi chuan sorkar hi a mualpho chiang a ni.

LAD emaw UD and PA department emaw hnuaia khawlaia hmun phiat chuan fai takin a phiat tur a ni a. Chutiang zelin PWD hnuaia MR a thawkte emaw chuan tun ang fur hunlaia kawngba an tihfai chuan fai takin an tifai tlang pui a. PHE tuisemte pawhin a tlangpui thu-in a hunah tui min pe thin. Chutih laia kawngpui a chhiat a mawhphurtu leh siamthatu awm ta lo tlat thin hi a huatthlalaawm lai tak chu a ni. Mawhphurtu niawm berte’n fur ruahtui tla an chhuan lam mek lai hian khawvela ruahtui tlak tamna ber kan thenawm Meghalaya state a Cherapunji khaw panna chu rulngan pa ang zar a ni deuh reng zu nia!

Sorkar department hrang hrang hian mawhphurhna leh hnathawh tur bik an nei theuhva. Chumi hna thawk tur chuan a thawktu mihring leh hnathawhna tur sum an nei bawk a. Department thenkhatah chuan an hna kha thiamna bik neih ngai a nih avangin thiamna bik nei an ruai thin a, kawngpui sial leh enkawl kawnga mawhphurtu PWD pawh hi helama thiamna nei engineer rual chhawra kawltu department a ni. Hnathawhna tur sum pawh hi a nei ngah ber department an ni a, tuteemaw sawi dan takin department mawm tak, chief minister emaw a minister zinga thiltithei deuhvin an enkawl deuh zel a ni a. An hotu lawk atanga a hniam lam deuh thlenga hnathawk tam ber hausa deuh bik tura mipuiin an
ngaih department a ni bawk.

Chutiang a ni chung a Mizoram chaklakna ber kawngpui heti khawpa a tha lo leh kal a hrehawma a hlauhawm mai hi kan ram hruaitu lu ber atanga a mawhphurtu engineer zawng zawngin mutmawh-hnarmawha neih ngei ngei chi a ni a. Chutih lai chuan kawngpui chhia leh lei chim fo hi a mawhphurtute hian an muttui loh phah lem lo nia ngaihna a awm fo thin. A hrehawm ti leh zin lai a mutthluk chu sawi loh chetsual hlau reng renga awm thin chu mawhphurhna pek lem loh mipui mimir hi kan ni thung.

Sorkar department hrang hrangin tihtur bik leh mawhphurhna bik an nei kan tih tawh kha, an tihtur hi tlin takin hlen chhuak zel sela sorkar tha kan nei a ni mai a, ram nuam tak kan nei bawk ang. An hnathawhna tura hnathawk satliah pawh ni lo mithiam rual kawl teuh chunga an thawh tur ang an thawk thei lo leh mipui rawngbawl hna an tlin lo lutuk hi zahna chang an hriat a hun ta hle a. District bawrhsapin an tihtur ti a an mawhphurhna hlen tura thupek a siam ta hial hi chu harhchhuah kawk kawkna tur chi a ni e.

Share post:
avatar
  Subscribe  
Notify of