Kar leh chhung Pro Fight entry form a lak theih

Zothan Autoworks LPS Pro Fight-a tel tur tan kar leh thawhtanni atangin LPS Office, Zarkawtah entry form lak chhuah theih a ni a, theh lut tawhte tan tihthar a ngai lo.

Nikumah a vawi riat nan Pro Fight buatsaih turin hmalakna peih fel hman a ni a, a hun leh hmun tur pawh puan fel tawh a ni. Mahse, Mizoram Assembly Inthlanpui vote chhiar nan R Dengthuama Indoor Stadium hman a nih avangin Pro Fight khelhna tur hmun leh hun nen a insu buai a, kuminah sawn hlat a ni.

Nikumah mi 310 chuangin entry form an theh lut tawh a, hengte hi rin zui vek tur niin kum kal taa theh lut ve hman lo tan kar leh thawhtanni atanga inrinni thlengin form lak chhuaha theh luh theihna hun hawn belh a ni.

Pro Fight hnuhnung ber 2017 khan champion lai tel lovin boxer 289 ziah luh an ni a, tun tumah hian boxer engzat nge tel dawn tih a la hriat loh a, January 31-ah Hawla Indoor Stadium, Republic Vengthlangah zing dar 7 atangin tel tum zawng zawng inbuk leh medical test neih tur a ni.

Tun tumah hian a vawi khat nan India hmar chhak state dang atangin boxer tel tura sawm an ni a, a tlem berah 10 tal an tel theih ngei Organising Committee chuan a beisei a ni.

Weight hrang pangaah title an inchuh leh dawn a, weight tinah lawmman pawisa fai tihpun a ni a, lawmman tesep dang tel lovin a vaiin Rs 4,40,000 sem chhuah tura ruahman a ni.

Weight tina champion-in Rs 50,000 an la ang a, Title Fight-a chak zo ta lo hnenah Rs 20,000 hlan a ni ang. Champion laiin a tlem berah Rs 20,000 an dawng dawn a, hetih lai hian title chuh tur zawnna final-a chak lovin Rs 10,000 lain semifinal lutten Rs 4,000 theuh an dawng dawn a ni.

Share post:
avatar
  Subscribe  
Notify of