Kan sorkar chhungin STA thu angin Aizawlah taxi permit thar pek kan nei lo : Transport Minister

Kan sorkar chhungin STA thu angin Aizawlah taxi permit thar pek kan nei lo : Transport Minister 1

LUNGLEN BUREAU
Aizawl, September 20, 2018
Transport Minister John Rotluangliana chuan vawiina Mamit District Transport Office building thar, Staff Quarters ni nghal bawk a hawnnaah an sorkar chhungin State Transport Authority (STA) thutlukna angin Aizawl khawpui tan bik taxi permit thar pek an neih loh thu a sawi.

Transport Minister chuan STA thutlukna anga an kal thu a sawi rual hian kum 10 tlan tling tawh, replacement registration thar tihsak erawh an neih thu a sawi a. Motor in-fit leh fit loh MVI officer-ten en mai tawh lovin a enna khawl bun tum mek a nih thu sawiin Rs, Vbc 15 hmangin Inspection & Certification Centre bun thuai a nih dawn thu a sawi.

DTO Office thar hawngtu khuallian chuan mahni in ngeiah thlamuang takin thawktute chuan mipui rawngbawl hna an thawh theih tawh dawn thu sawiin anmahni dawrtute chu hawihhawmna nena inpe zo taka dawngsawng thin tur leh anmahni dawrtute lo thawhsak thin turin a chah a. DTO office-a staff-te chu smart tak leh an hnate chu hnehsawh leh hrechianga biak nuam taka dawrtute thawhsak thin turin a chah bawk.

Transport Minister chuan an department chuan hmasawnna tam tak a hmuh thu sawiin DTO office hi Siaha leh Lawngtlai district-ah pawh sak zawh tep a nih thu a tarlang a. Aizawl District Transport Officer pawh Urban leh Rural-ah then a nih thu te, eizawnna ngialnghet nei lote tan Aizawl khawpuiah Two Wheeler Taxi service-tir a nih thu leh khawpui chhehvelah Auto Rickshaw tlantir mek a nih thu a tarlang.

Er. R.Lalrammawia, Jt. Director (Hqrs), Transport Department chuan building thar chu PWD Building Division atangin assessment an dawn hnuah Revenue atangin Inspection Certificate leh Land Purchase Board phalna anga lei an nih thu a sawi a. Building hi Bialtu Minister, department hotute bakah sorkar hmalakna vang liau liaua lei thei an nih thu a sawi.

DTO Office hawn tak hi Rs. Nuai 100 senga mi mal in sak sa lei a ni a. Thawktu hi DTO bakah 7 an awm mek a, a building hi chhawng 5 niin office bakah staff quarters 4 a awm thei dawn a ni.

Share post:
avatar
  Subscribe  
Notify of