Kan khuaah chuan naupangte pawhin a takin faina an nunpui tawh : Biate VC

Kan khuaah chuan naupangte pawhin a takin faina an nunpui tawh : Biate VC

LUNGLEN BUREAU
Aizawl, October 5, 2018
Mizoram khawfai bera kum hnih a zawna thlan tawh, Biate khaw VC-te chuan an khua chuan kum 1935 vel atangin faina an kalpui tan tawh thu sawiin, “Tunah chuan naupangte pawhin faina hi a takin an nunpui tawh,” an ti.

Nimina Mizoram Journalists’ Association (MJA) hruaituten NEDP hmalaknain Biate khua an tlawhnaah MJA hruaitute nen hian Biate VCP R.V.Hluna inah an inkawm a, Biate VC-te chuan faina hi kum 1935 vel atanga kalpui tanin kum 2012 atangin tih tak zetin beihpui an thlak tih an sawi.

Biate VC-te chuan tunah chuan an khuaa naupangte pawhin faina chu a takin an nunpui tawh tih sawiin a hranpaa bawlhhlawh siam an awm lo niin an sawi a. “Khawlaia bawlhhlawh tla a awm a nih pawhin naupangte pawhin an chhar nghal zel,” an ti a. An khawlai an cheite pawh veng hrang hrang mipui thawhkhawma an chei a ni tih an sawi bawk.

Biate khuaah hian veng 14 awmin veng hrang hrangte hian anmahni senso in bawlhhlawh bawm leh cheimawina an siam thin a. Biate VC kaihhruaina hnuaiah Biate Town Faina Committee dinin brand ambassador 5 an awm a. Biate Town Faina Committee hmalaknain kar khatah tum khat motor hmangin bawlhhlawh paih a ni thin a, bawlhhlawh hi a tawih thei leh tawih thei lo thliar hrangin a tawih thei lo hi an hal ral a, a tawih thei hmangin lei tha an siam thin a, hei hi mipui hnenah an hralh chhawng leh thin.

Biate khua tlawhtu MJA hruaitute hi MJA General Headquarters President Zonunsanga Khiangte-in a ho a ni.

Share post:
avatar
  Subscribe  
Notify of