KA PU – DOCTOR CHIBAI : – Lalrozara

KA PU - DOCTOR CHIBAI : - Lalrozara

Serampore College in Pu Lal Thanhawla Doctor of Divinity an pek tur thu ka hriatin ngaihtuahna rilru Positive leh Negative (Side A & B) a rawn lang zut zut a. Negative- Side B thenkhatah chuan Pu Hawla hian Theology lam a lo zir tel reng em ni? Evangelist te angin Speaker ah te a lo tang thin em ni?

Pathian thu zirna -Theological College chhuanawm leh hmingthang tak, Serampore hian Bible chhung Theology zirna paper chhungkhung tho, ram dinhmun, mihring khawvel leh khawtlang nunphunga Christian zitirna nunpui, ram leh khawtlang tana Christian nun vawnnun. India ram leh khawvel ramdang thlenga Christian sakhua ti zahawmtute hnenah Doctor of Divinity a lo pe thin a. NE Politician zingah Naga leh Khasi ram hruaitute pawh Doctor of Divinity a lo pe nual tawh tih ka hre ve hnuhnawh a ! Mizote atanga Pu Hawla’n a dawng tur hi a phu viau in ka ngai leh ta lawi a nih chu !.

Serampore College in India rama Christian population tlemte awm zinga Christian Politician te a chawisan duhna rilru hi a ril hle in a lang. A Secular chhungah a thianghlim bawkin ka hria. Christian Politician te chu Sakhaw dang betu Politiciante aia Divine – Thianghlimna kawnga thuk zawk leh invawng fel tura fuihna nasa tak a kengtel awm e. Mizo Leader – Pu Zoramthanga, Pu Lalduhawma, Pu Lalhmangaiha Sailo leh midangte pawhin Serampore College atang hian Doctor of Divinity dawng thei sela, Mizoram leh India rama Christian te tan hmalam panna a ni dawn sia. Mizoram hruaitu Minister leh MLA te pawhin Serampore College Doctor of Divinity nei fur thei ila, kan State Sorkar leh mipui kalphung hi a felfai deuh awm e.

Congress Party ah hun reitak ka lo awm ve tawh a. President ber Pu Hawla leh hotu dang hnungzuiin Zoram thingtlang hmun hrang hrang pawh ka fang a. Pu Hawla hi Democrats – Secular leh Christian chhungril hlein ka hmu thin. Christian thuk tak a nihna lanna fo chu a nungchang chetzia, Sakhaw dangte a zah saknate hi a ni tel bawk ang. India ram sakhuate dinhmun a hrechiang a. A theihna chinah hmun hrang hranga Christian te hmakhua ngaiin, Christian te harsatna tawh thinna kawngah Christian te thlavang hauhin a thawhhlawk hle, inches khat pawhin a hnungtawlh ngailo. Delhi AICC atanga Mizoram enkawltu tur leh Election Campaigners lo chhuak tur Vai Politician zingah pawh Christian ngat a zuk ngen zel thin.

Sawi zel ila – Kum 2008 MLA Election Serchhip leh Hnahthial bial, Pu Hawla a din kawp a, Campaign sosan tawhhnu khan Hnahthial Rest House- pindan chhungrilah Pu Hawla,Pi Rii leh Kei kan pathumin kan thukhawm a. Sum senso ngaih nasat a tul thu leh Party dang Block leh Unit hruaitu thenkhat Congress Party rawn zawm duh an awm nual, mahse sum leh pai an phut thu ka sawi bakah, hei hi tlin leh tlak inkar a ni, ka la ti zui a. Pu Hawla kha a inngaihtuah viau “Sum hmanga tlin hi a tha lo, ka duh ngailo, sum pawh kan chhungkuain kan neilo, tlak a tul pawhin tlak ka hnial lo a nia, Zarte – sum lovin hneh tum ta che ” tiin min chhang. Election ah Pu Hawla hian sum hmang teuh teuh angin an sawi duh tho a. Amah nilo, Campaign puitu midangin sum an lo sen sak emaw, chelek a nih chuan ka hrephak lo. Delhi AICC lamin sum an rawn tawktarh thinte pawh a lo hniala hnartu a ni fo thin tih hi chu Congress hruaitu tam takin an hreve awm e.
CM a nih chhungin Corruption ah a fihlim em tih chu ka hriatpui thuk hauhlo. Mahse, Corruption do tura amah a fihlim thu erawh a sawi huai ngam viau. Kum 2008 Congress Campaign auhlaa “Corruption a zung nen kan phawi ang” a tih khan Mizo mipui a hneh hlein ka hria A CM na term chhung a Minister thenkhat erawh an Corrupt viau hlawmin ka hmu, a tan Control an harsa viau emaw ni le ? A CM chhunga Minister thenkhat Corrupt miahlo pathum/pali an awmve ziah hian erawh min tihlim viau.

Sorkar kalphungah Pu Hawla hian dan a zaha, Party chhungah pawh dan a zah viau. “Danin engtinnge a sawi, kei chu dan thiam ka nilo a nia, dan thiam khan han bih ngun teh u” a ti mai thin. A hriatloh chu a hrelo ngam. Helai tak hi sorkar Officer ho pawhin an zahna a ni em aw ka ti thin. Mahse Mihausa Firm NECS te Contract thawhna bill atanga chhiah ngaihdamna a pawmpui kha chuan min barakhaih hle, ka hrethiam thei ve lo, ka hmuhdan pawh a ner sawk. Mihausa chhiah awlna tur kawnga CM nawrtu Minister leh MLA thenkhatte pawh kha an zaktheilo ka ti.

Pu Hawla anga Politics platform atanga Bible chang leh Pathian thu, Pathian duhdan tlangaupui hnem hi an awm bik angem aw?. Politician ten Politics chhunga Pathian thu sengluha an sawi tel thin hian mipui leh Party Workers thlengin Pathian ngaihsakna leh Politics leh Party chhung khawvel a tih thianghlim phah ti ila, ka sawisual lovin ka ring. Mizoram Politics bawlhhlawhna siamtha tur chuan Kristian Sakhuana leh Politics kal kawp tir a ngai dawn lawm ni ? Vote zawnna atana Pathian hming lam ringawt erawh thliar hrang thiam ila.

Pu Hawla sawifo thin leh mipuiin hria ila zawm thei ila a duh “Ram tinah kal ula thil siam zawng zawng hnenah chanchin tha hril rawh u” tih hi Pathian Order a ni tiin a sawi ngun hle Pathian in Thing leh Mau, Ransa leh Nungcha tinreng a siamte, enkawla dimdawitu tura mawhphurhna pek kan ni. Pathian min pek kan taksa vawng thianghlim tura Meizial,Sahdah leh Kuhva a dodalnate, kan taksa kan ti bawlhhlawh tur a nilo tih zirtirna kawngah thahnem a ngai a. Pathian nung, A zawnchhuah ram tihte phei chu a lamri zing ber pawl a ni hial awm e.

Pawimawh deuh bawk chu, Congress Thalai kan nihlai in a hnung kan zui thina,Thingtlang lama Bawng leh Vawk, Kel leh Arva min talh chang a tam a. Chaweina hmunah Pu Hawla hian kan chaw leh sa eidan thleng hian min thlir ru-in ka hre “Politician nih bul intan dawn chauh a, Chaw leh Sa ei thuah in taksa insum hle rawh u, nakin lawkah in hriselna in tichhia ang” tiin min zilh hlawm thin a. Tunhnu hian ka man thiam phak chiah. Politician leh tute tan pawh zin kualna lama Sa ei nghek nghek hi a lo hrisel hauh lo.

Helai bawr hi Doctor of Divinity a hmuhna a ni mai thei – Kum 20 zet thisen inchhuahna rambuai nih hnu-ah inremna thlen tira, rambuai senghawi a nih dan kawng hi a zahawma, phuba lakna emaw thinrimna reng reng awm lovin, tute-mah hel leh tum pawh awmtawh lo, State ralmuang ber kan inti hial a ni. National Politics atanga Mizoram State Politics thlirna emaw Politics History chanchin ziaktute tan pawh Mizoram rambuai senghawi lai kha Pu Hawla CM hunlai a ni tlat a.Pu Hawla CM nihna leh Lalna thuthleng kha Pu Laldenga’n Vote khat pawh hmulo in a luah miau a. Politics chhunga Lalna inchuhna hautak zet, dinhmun inkenna thleng kha Christian Politician-te tih a mawi a ni tlat a ni.
Thenkhat chuan “Pu Hawla CM chhung khan Kohhran hrang hrang in Aizawl khawpui chhungah Biakin hmun nei an tam lutuk a, Serampore College hian Doctor of Dicinity a pek phah a ni ” an ti ve thung a. Engpawhnise, Serampore College hian tehna hrang hrang an hmangin Pu Hawla chanchin hi nasa takin an zir dawn a, a thenawmpa thlengin an zawt turah ngai mai ila.

Serampore College in Pu Lal Thanhawla Doctor of Divinity a pekna hi thil lawmawm leh chhuanawm a ni tih hi mi pangngai rilru puthmang tur niin a lang. Politics Party ruihchilhna atanga mahni Party hotu nilote kan thlirna, Side B (Negative) Tarnit atang erawh chuan a dang daih mai thei. Mipuiin kan hriat fo tur chu Party leh Party inbeih hun a awm, mimal inbeih hun leh insawichhiat hun a awm, chung chu thliar hran thiam a tha.

Pu Hawla’n Doctor of Divinity a dawng tur hi thinlung taka lawmpui hi a Christian in ka ring. Keima lamah chuan khawiah emaw inhmuh hun a awm leh ngai chuan “Ka Pu – Doctor Chibai, ka lawmpui a che” tih hi ka kamchhuak a ni ang.

Share post:
avatar
  Subscribe  
Notify of