Joint NGO te hmalakna NPP in tha a ti

Joint NGO te hmalakna NPP in tha a ti

LUNGLEN BUREAU

Aizawl: National People’s Party, Mizoram chuan thuchhuah siamin MLA inthlan lo awm tur atana Tuikuk-in vote an thlak dan tur chungchanga Lalnunmawia Chuaungo IAS, Principal Secretary (Home), Govt. of Mizoram-in inthlan hmachhawnna tura a hmalakna chu tha an tih thu tarlangin, Mizoram pawna Tuikuk te vote thlak tir hi engtizawng mahin tha an ti lo, tiin an sawi.

NPP chuan dan ang thlap leh, Election Commission of India pawhin NGO-te hma ngeia ziaka an lo intiam tawh tlawhchhana Lalnunmawia Chuaungoa hmalakna chu an thlawp tlat a, Mizo tlangval that a, chumi hnua mahni duhthu ngeia Mizoram chhuahsan Tuikuk te hian Mizoram pawnah Mizoram sorkar roreltu tur an thlan hi rem kan ti tawh lo a ni tiin an thuchhuah chuan a sawi.

India hmachhaka leilung fate hamthatna ngaihtuahtu party kan ni a, mahni awmna state a kir duh lo, vawi engemawzah hruaikir tum an nih hnu pawha chhuanlam siam Tuikuk te hian an duh chuan Mizoramah lo haw in vote thlak se tih hi NPP duhdan leh dinna a ni.

Tin, state neitu Mizote zahna nei miah lova SB Shashank a thiltih dan hi Mizote tan a him lo kan ti a, chumi piah lamah a aia senior zawk lehnghal ECI-ah dik lo taka a lo zu hek avanga a chunga action lak a ni hi engti kawng mahin kan hrethiam lo a ni, NPP thuchhuah chuan a ti bawk.

Dan dik lo hmanga Tuikuk-te Roll-a thun leh vote thlak tura midangte aia duhsak bika vote thlak tir tumtu SB Shashank hi kan dem takzet, NPP chuan Mizoram tlawmngai pawl intelkhawm Joint NGO Coordination Committee in Tuikuk chungchanga dinna hi ṭha kan ti a, kan thlawp tlat a ni, tiin NPP thuchhuah chuan a tarlang bawk.

Meghalaya state-a Khasi leh Garo hnam thlavang huaisen taka hauhtu NPP chuan Mizoramah pawh Mizo hnam dinchhuahna tur leh venhimna turin a theihtawp a chhuah zel dawn a ni, tiin an thuchhuah chuan a tarlang bawk a, Mizoram political party hrang hrangte chu hnam thilah chuan party bil politics hamthatna zawng lova hnam tana lungrual turin a ngen bawk tiin an thuchhuah chuan a tarlang.

Share post:
avatar
  Subscribe  
Notify of