Inthlang turin Kolasib district inpeih fel thawkhat tawh

Inthlang turin Kolasib district inpeih fel thawkhat tawh

LUNGLEN BUREAU
Aizawl, September 24, 2018
Kolasib District Election Officer Dr. Arun T, IAS hovin vawiin khan DC Conference Hall-ah 2018 MLA inthlan lo awm tura an district chhunga inpuahchahna kalpui dan leh kalpui tawh chinte an thlirho va, inthlang tur hian an inpeih fel thawkhat tawh tih tar lan a ni.

He hunah hian Election Officer Vanlalchhuanawma Chawngthu, MCS chuan Kolasib district chu inthlanna awm tur atan a inpeih fel thawhkhat a ni tih a tarlang a, zanin atangin khaikhawm a ni dawn a, district hrang hrangte khaikhawmna nen Election Commission kuta thawn tur a ni ang.

Thutkhawmah hian inthlan kaihhnawiha committee peng hrang hranga Nodal Officer leh chanvo neite inhrilhhriatna hun neih a nih bakah Kolasib district-a vote nei zawng zawng chu 56,750 tih tarlan a ni a, heng zingah hian Service Voter 354 an awm.

Vote thlak kaihhnawiha hming thun luh, hming paih, vote neihna hmun sawntir, address thlak leh a dangte – form 6,7,8,8A hmanga dil theih chu dilna 10224 a lut a. EVM leh VVPAT Awareness-ah session khatna chu zawhfel tawh niin Awareness Van 5, Awareness team 8, Mobile Awareness Team 7, Static Awareness team 1 an awm a, Awareness Campaign hi district huam chhunga khua/hmun hrang hrang 62-ah neih niin EVM khawl hmanga vote thlak chhin 3787 an awm.

Awareness Campaign hi neih leh vat tura ruahman a ni a, September 27-ah hian Final Publication of Electoral summary neih a ni dawn a. He hunah hian Kolasib District Election website, deokolasib.mizoram.gov.in chu peihfel a nih thu tarlan a ni a, he website-ah hian district huam chhunga election kaihhnawiha hmalakna hrang hrang bakah polling station hrang hrang leh thil dang tul leh pawimawh dah a ni.

Thutkhawmnaah hian election kaihhnawiha chanvo hrang hrang neite bakah NGO hruaitute, MPF aiawh leh political party hrang hrang aiawh an tel.

Share post:
avatar
  Subscribe  
Notify of