India-in Windies lakah 3-1 in ODI series a la

India-in Windies lakah 3-1 in ODI series a la
Mumbai: Indian player Virat Kohli celebrates with his teammates the dismissal of West Indies' batsman Kieran Powell during the 4th ODI cricket match at Brabourne Stadium, in Mumbai, Monday, Oct 29, 2018. (PTI Photo/Mitesh Bhuvad)(PTI10_29_2018_000201A)

LUNGLEN SPORTS
India-in a mikhual West Indies lakah 3-1 in one-day international series a la a, ninganiah Thiruvananthapuram-ah a vawi ngana leh a hnuhnung ber khelin wicket kuain mualneitu team an chak.

Thumvawra chak Windies captain Jason Holder chuan vuak hmasak a thlang a, an chak a nih chuan mualneitu India nih rualin series-ah 2-2 in an inhnehtawk thei a ni.

Mahse, Indian bowler-te hmaah a tir atangin harsatna an tawk nasa nghal hle. Left-arm spinner Ravindra Jadeja chuan wicket li a la a, over 31.5-ah Caribbean team-in wicket an hloh zo vek a, run 104 chiah an siam.

Indian pacer pahnih Khaleel Ahmed leh Jasprit Bumrah chuan wicket hnih ve ve an vawm tla bawk a, Windies lamah captain Holder chuan 25 hlapin mi mala siam tam ber a ni.

India-in chak turin 105 a mamawh a, awlsam takin over 14.5-ah an tum ram an thleng a, Rohit Sharma chuan 62 siamin ball 54 a hmachhawn a, captain Virat Kohli chuan ball 29 atangin run 33 a siam bawk. Mualneitu team hian wicket khat chiah an hloh va, a tawp thlenga din dun Rohit leh Kohli chuan an inkawp chhungin run 99 an siam a ni.

India nena ODI an khelh tawha West Indies-in run an siam tlem ber a ni a, Kohli erawh India captain ni tawh zinga mikhual laka ODI series vawi ruk la zawn hmasa ber a ni ve thung.

Tun series-a an inkhelh hmasak pathumah team pahnih an inhnehtawk hle a, vawi khat inhnehtawkin tum khat ve ve an chak. Mahse, a hnuhnun khelh hnihah Windies an zuih nasa a, a hmain Mumbai-ah chiang takin India-in hnehna a chang tawh a ni.

Share post:
avatar
  Subscribe  
Notify of