India-in New Zealand-ah ODI series a la

India-in New Zealand-ah ODI series a la

India-in thawhtanniah wicket sarihin mualneitu New Zealand a hneh a, One-day International vawi nga an khelh turah a hmasa tum thumah chak zawnin series a la fel tawh.

Bay Oval, Mount Maunganui-ah New Zealand-in an thawk hmasa a, over 49-ah wicket hloh zovin 243 an siam. India-in harsa lo takin chak tura a mamawh a tlin a, over sarih a la awm tihin 245 a siam a, wicket thum chiah a hloh a ni.

Mualneitu New Zealand-in series la thei turin chak ngei ngei an mamawh a, an khelh hmasak vawi hnihah an tlawm zawn tawh avangin theih tawpin an bei let.

Ross Taylor chuan 93 hlapin Kiwis tan beiseina a siamsak bakah Tom Latham chuan half century siamin 51 a thawk chhuak bawk.

Mahse, New Zealand hian chak thei turin run an siam tam tawk lo va, nghet tha tak leh inrintawkna sang tak nei chunga khel mek India-in a tir atangin tlo takin an um.

A tira lut pahnih zingah Rohit Sharma chuan 62 hlapin ball 77 a hmachhawn a, Shikhar Dhawan erawh 28 siamin a chhuak. Wicket hnihnaah Rohit leh captain Virat Kohli an inkawp fuh hle a, Kohli hian ball 74 atangin run 60 a siam a, an thawh dun chhungin run 113 an hlawh chhuak a ni.

A hnuah Ambati Rayudu leh wicket-keeper Dinesh Karthik te fuh takin an inkawp bawk a, Rayudu hian 40 a siam a, chhuak lova a tawp thlenga ding tluan Karthik chuan 38 a thawk chhuak a ni.

Hlawhtling takin India team-in tuipui ralah hun an hmang mek a, a hmain a vawi khat nan Australian leilungah ODI series an la a, New Zealand-ah vawi thum an chak zawn zui leh nghal a, kum 10 chhunga Kiwis leilunga ODI series an lak vawi khatna a ni nghe nghe.

Mikhual India-in series la fel tawh mah se khelh hnih an la nei a, ninganiah Seddon Park, Hamilton-ah a vawi li nan an inkhel ang.

Share post:
avatar
  Subscribe  
Notify of