I-League : Aizawl FC 0-0 Real Kashmir

I-League : Aizawl FC 0-0 Real Kashmir

LUNGLEN SPORTS
Coach thar Stanley Rozario-an kaihruai hman lo mah se Aizawl FC-in point an thawk chhuak a, zirtawpniah Real Kashmir nen Rajiv Gandhi Stadium, Mualpuiah I-League an khel a, goal awm lovin an inhnehtawk.

Kum 58 mi Rozario hian a club thar Aizawl inkhel en hman tum mah se thlawhna thlawh hun an sawn tlai avangin a hmuna inkhel entu zingah a tel thei lo va, Jonathan Lalbiakkima’n head coach mawhphurhna lain tun season-a che tha tak, kai thar Kashmir lakah goal an venghim tluan thei.

Mizo club hian kar hmasa inrinni khan Indian Arrows mikhualin si khat faiin an tlawm a, hemi hnu hian head coach a nihna atangin Gift Raikhan a bang a, Aizawlin a aiawh turin Indian football-a tawn hriat nei tha tak Rosario an la lut a ni.

Coach tharin a ho hma, hun khaihlakah Jonathana leh Rohmingthanga’n team an kaihruai a, first half chhungin khel chhe lo mah se goal thun tur khawpin an nawr na tawk lo. Second half-ah mikhual team an langsar zawk a, mahse, hun tha an neih an puitlin zo bik lo va, Kashmir hian hnehna chang se table chung bera inhlangkai thei an nih laiin pathumna an luah zui zel a ni.

Aizawlin hliam vangin forward tha pahnih Ansumana Kromah leh Lalkhawpuimawia an hmang thei lo va, an khelh leh hunah erawh an inlan hman ngei an beisei a ni.

Mizo team hian khelh 12-ah point 10 hmuin pakuanaah an insawn chho va, Kashmir-in tum 12 tho an khelh tawhah point 22 thawk chhuakin hmahruaitu Chennai City aiin point hnihin an hniam a, vawi khatin an khel tam ve thung a ni.

Aizawlin hmahruaitu Chennai tlawhin January 18-ah an khel leh dawn a, coach thar Rosario-a hnuaia an khelh hmasak ber tur a ni nghal a, fiahna hautak leh pawimawh tak a ni ang.

Share post:
avatar
  Subscribe  
Notify of