Hachhek bialtu Rinmawia Ralte-in a bial khaw tinte oxygen khawl pek vek a tum

Hachhek bialtu Rinmawia Ralte-in a bial khaw tinte oxygen khawl pek vek a tum

LUNGLEN BUREAU
Aizawl, September 21, 2018
Lalrinmawia Ralte, Bialtu MLA, Political Adviser to CM chuan nimina Rs. Nuai 86 senga sak, Saikhawthlir Secondary School a hawnnaah a bial mipuite mamawh, oxygen khawl chu a bial khaw tinah pek vek tum a nih thu a sawi.

School tuala hawnna inkhawm neihah Lalrinmawia Ralte chuan Hachhek bial chhunga khaw tinten an mamawh, oxygen khawl pek vek tum a nih thu sawiin hei hi damlo thawhah thut, damdawi in pan hmaa harsatna nei tan a tangkai dawn thu a sawi a ni.

Bialtu MLA chuan Saikhawthlir khua chu kum 2008-a Hachhek biala rinluh a nih atangin zirna lamah nasa taka tihhmasawn an nih thu sawiin RMSA leh SSA hnuaiah a bial chhung khaw hrang hrangah school building thar tam tak sak a nih thu a sawi a, “India leh Mizoram sorkar chuan zirna a ngaih pawimawh avangin zirna kawnga hma kan sawn zel nan nasa takin hma a la zel dawn,” a ti bawk.

Bialtu MLA chuan zirlai naupangte fuihin lehkhabu chhiar tam turin a ti a, ngaihtuahna dik, rilru dik kan put a pawimawh tih sawiin, “St Pauls High School-a Class X Exam turte pawhin text book-a mi tho kha an chhinchhiah ve a ni tih inhriat a tul a, thingtlang leh hmun hla zawka awm kan nih avangin zirlaibu hran kan zir bik lo,” tiin, a pawimawh ber chu tumruhna leh tih takzetna a nih thu a sawi.

He hunah hian Lalnunthari, DEO, Mamit pawhin thu sawiin Mamit district-a ziak leh chhiar thiam lo mi 8000 lai an la awm chungchangah mite ziak leh chhiar thiam tura puihna kawngah theihtawp chhuah turin kalkhawmte a sawm a, “Kan hmaa census kan hmachhawn turah result tha tak kan neih ka beisei,” a ti.

Saikhawthlir RMSA High School hi 386 sq.m a ni a, Mizo pa chhiara chhawng hnih niin, Computer Room, Laboratory Room, Art & Craft Room nen a vaiin room 8 a awm a. Ruahtui khawlna tur Sintex Litres 4000 dah a ni bawk. Headmaster hovin thawktu 4 awmin zirlai naupang 30 an awm bawk.

Building thar hawnna inkhawm hi H.T.Lalthlengliana, VCP-in a kaihruai a, khawtlang aiawh leh Organising Committee aiawhten thu an sawi bawk.

Share post:
avatar
  Subscribe  
Notify of