Freddie Mercury/Queen biopic thar tur Bohemian Rhapsody trailer ka thlir ve, nghahhlelh a ti zual mange…

Freddie Mercury - Queen biopic thar tur Bohemian Rhapsody ka thlir ve, ka en chak viau chhan

“Kan zai ngaithlatute hi hla danglam tak pek ka duh, an lo tel ve a, min zawmpui theih tur, sak dual dual rem tak mai” tia Brian May-a’n a sawi zawh rualin trailer-ah chuan Freddie-a chuan:
“What’s the lyric?” tiin a zawt let a, chumi rual chuan…
“Buddy you’re a young man, hard man” tiin Queen anthem tia sawi fo thin hla chu a rawn thum nawn nghal a, trailer chauh la ni mah se Queen ngaithla a, ngaina tan chuan hmulthi a ding sung sung thei.

By Sangzuala Hmar
Chief Editor, www.lunglen.com

News ka ziak tluk tluk a, a then ka copy chhawng a, mahni hahawlh zawng pawh ka thai hman meuh lo, mahse hei hi chu ha a hawlh na zual tlat. Hmangaih berte lenna Kolasib atangin Hriatpuia Pa hian han thai zawk sela ka ti viau nain ka phal chiah bawk si lo.

Tukin thawh velah tihdan pangngai ang bawkin news website leh social media lam kan thlek thuak thuak a, Facebook lamah thianpa TKA HNAMTE midangin an lo tag-na Freddie Mercury/ Queen band chanchin tihlanna movie thawtlawkna video chu ka hmu ve a, www.lunglen.com Freddie Mercury leh Brian May te hming kan hmuh chuan thlek chhin lova han keu pelh mai a harsa hle.

Hun engemawchen liamta khan Sacha Baron Cohen-a thlakin Rami Malek chuan Freddie Mercury-a lem a chang dawn tia khawthlang lam chanchinthar lama ka chhiar khan a ang thei dawn mawni le aw, te ka ti ve mai mai a, mahse a thawtlawkna, a trailer kan en chiah chu(h)… a ang kher mai.

He Queen biopic hi engtikah nge a chhuah ang aw tiin ka lo nghakhlel ve hle a, a trailer han en chiah phei chuan en a chakawm lehzual nasa kher mai. Movie an review thin a, an ti ngai em ka hre hlei lova, a trailer hian review a phu tih chu ka ngaihdan a ni a, trailer ka hmuh atang hian nawrtu a awm tlat.

Freddie Mercury - Queen biopic thar tur Bohemian Rhapsody ka thlir ve, ka en chak viau chhan 1

Bohemian Rhapsody trailer hi minute thum dawna sei a ni a, tunlai hlate hi chu tunlai tawngkam takin ‘mash-up’ ka ngaithla tam ve viau tawh a, mahse Queen hla ‘mash-up’ erawh ka la hre ngai lova, thil remchang theiah pawh ka ngai lo, ka beisei bawk hek lo. www.lunglen.com Mahse Bohemian Rhapsody trailer-ah hian remchang em emin Queen hla thenkhatte mash-up an ni a, a rem em em vek mai leh nghal.

He trailer hi ilo la en lo a nih chuan… hei hi han ngaihtuah vang vang chhin teh, Bohemian Rhapsody leh We Are The Champions hlate hi han chhunfin dawn chhin teh, tunlai tawngkam takin han mash-up dawn chhin teh. I rilruah i remkhawm thei a nih chuan kha aw… mihringa thathona siam thei khawpa bassline tang tha 1980 kum hla hit Another One Bites the Dust hi i mash-up tawhsa ah khan han belhchhah leh teh, a rik dan tur pawh i hrethiam tawh kher lovang, Bohemian Rhapsody movie trailer-ah hian inrem em emin an chhungkhawm a nia aw. A trailer chauh a ni a, a movie takah phei chuan engtin tak ti ang maw.

“Kan zai ngaithlatute hi hla danglam tak pek ka duh, an lo tel ve a, min zawmpui theih tur, sak dual dual rem tak mai” tia Brian May-a’n a sawi zawh rualin trailer-ah chuan Freddie-a chuan:
“What’s the lyric?” tiin a zawt leh a, chumi rual chuan…
“Buddy you’re a young man, hard man” tiin Queen anthem tia sawi fo thin hla chu a rawn thum nawn nghal a, Queen ngaithla a, ngaina tan chuan hmulthi a ding sung sung thei.

Darkar hnih movie-ah kum engemawzah chanchin hi a leng ngai lo, biopic director te tan a eng laiin mipui mit la ang, a eng lai nge hmuhnawm thei ang tih ngaihtuah chhuah thiam a ngai a, Bohemian Rhapsody hian Queen chanchin-a kan hriat tam loh lai, bul an tan chhoh lai a hrut zauh tih trailer atang hian a lang thei.

Freddie Mercury kha Queen band frontman hmasa leh a dintu a ni hauh lo. www.lunglen.com Freddie Mercury tia a hming sawi a nih hmaa a hming tak zawk Farrokh Bulsara tihte he trailer hian a tilang zuai zuai a, Queen pawh an la ni lova, Freddie-a’n a zawm tirh hian ‘Smile’ an ni teh tlat! Mak angreng deuh mai chu Freddie Mercury hian he band-a an bassist Tim Staffell-a hmunruak a luah a nih chu! Freddie-a thianpa a ni nghe nghe a, a ni hian 1970 khan Humpy Bong a zawmsan daih, a ti fuh vak lo.

Trailer chuan a fast forward nghal a, Freddie Mercury-a rawtna anga Queen tih hming an put hnua an original line-up anga an pawm tak Mercury, May, Taylor leh Deacon te’n July 1971 kuma show an neih hmasak ber te ennawm theihpatawpin trailer ah hian tihlan a ni.

Freddie Mercury - Queen biopic thar tur Bohemian Rhapsody ka thlir ve, ka en chak viau chhan 2

Trailer-a a landan chuan Bohemian Rhapsody movie hian Live Aid-a Queen che tha em em mai chu a vawrtawp atan a thlang tih a hmuh theih ruak ruak a, show ropui tak tak anmahni pual an ngah tehreng nen Live Aid a hmang daih hi a mak angreng viau. Mahse an chetchhuah tawhnaa an hmuhnawm ber tum chu 1985 Live Aid kha a ni titu an tam tlat.

Chumi piah lamah Wembley-a Live Aid hi khawvel pumah mi tluklehdingawn 1.5 in an thlir a, tanpuina concert hi tudang ni lovin Bob Geldof-a ruahman a ni. Freddie Mercury Tribute Concert-a Extreme chet thatzia hmutute chuan Extreme chhinchhiahnan kha concert kha an hmang ang bawkin Ethiopia tam rapthlak lutuk tuarte tanpuina concert-a Queen che vel hi an chhinchhiah a, a vawrtawp lai atana an hmang hi a mak lem lo, te ka ti ve mai mai. www.lunglen.com U2, Elton John te bakah a hunlaia band tha ber berte an inlan a, khawvela live concert ropui bera chhal a ni hial!

Zepthu cheng lo, a zaithiamna piah lama a larna pakhat chu MKH a nihna ti ila a sual hauh lovang, hei chu kan hre sa vek, Queen ngainatu tam takte’n kan hriat hmaih fo thin pakhat – hmangaih em em a neih thu, chu a hmangaih em em chu hmeichhia a ni tih hi. Helai tak hi Bohemian Rhapsody trailer hian min hmuhtir a. www.lunglen.com Mipat hmeichhiatna kawnga a nun thui tak a lanchhuah tir a, a zaithiamna piaha a khawvel tawn pawm harsa lai kan hriatlar em em MKH a nihna phenah mipa dang ang bawka hmeichhe hmangaih em em Mary Austin nei a ni tih he trailer atang hian a hmuh theih, Freddie-a nun thuhruk hailanna duhawm tak a va ni em.

Freddie-a’n “the love of my life” tia tawngkam a lo neihte pawh kan hmu tel turah ngai ang.

A trailer-in min sihhmuh thuak piah lamah he a rawllai di hi a rosum khawmtu zingah a telh tihte pawh a movie puitlingah han hmu tel thei ila ka va ti em, a hnu lama ‘hot chicks aia hot men’ a thlan takte kan thinlunga cham lian ta zawk umbotu atan; a nihna dik zeppui ka tum lam ni lovin Freddie Mercury-a hi MKH a nih hmain MKH lo a ni tihte kan hriat hmaih kumkhua ang tih ka hlauh vang mai a ni. www.lunglen.com A thinlungah MKH a nihna aiin MKH lo a nihna a lian zawk ka ti ngam bal. Chuti ni lo se ‘love of my life’ tia a sawi Robert-a emaw James-a te a ni ngei ang.

Freddie Mercury - Queen biopic thar tur Bohemian Rhapsody ka thlir ve, ka en chak viau chhan 3

Bohemian Rhapsody movie siam a nih dawn khan Freddie Mercury-a lem chang turin Sacha Baron Cohen-a biakfel vek a ni tawh a, a thawnthu an thlek thuak thuak a, Aids a vei chhoh dan leh a kaihhnawih thil a lan tlem avangin Cohen-a hian a dikhlel thei tiin a tui ta lo niin an sawi a, a aiah Malek-a thlan a ni ta a ni.

Aids veite namenlohva diriam an nih laia hun harsa tak a tawhte tihlan a ni, ni e, Sacha Baron Cohen-a’n a lifestyle chhe tak mai tihlan a ni lo tia a selna te pawh a awm viau mai thei, mahse he trailer hian Freddie-a Aids vei leh a veidan, a nun chhe lai phawrh a tum lem lova, rimawi khawvela a thawhhlawk zia leh Freddie-a chanchin ennawma lantirna a ni tlat alawm. “Sacha Baron Cohen, he movie hi Freddie-a’n Aids a vei tihlanna movie a ni lo” tia hmaichhanna han kawh sawk sawk a chakawm thei mai dawn alawm mawle.

Lo chhuak tawh se, thianpa Angaiha, Cydit Communications hian han download vat vat se, internet a muang lutuk tih ngai lovin a download veleh a computer atangin pen drive-ah download zui ve zat ila…

Share post:
avatar
  Subscribe  
Notify of