Federer leh Djokovic-an Paris Masters quarterfinal an lut

Federer leh Djokovic-an Paris Masters quarterfinal an lut

LUNGLEN SPORTS
Roger Federer leh Novak Djokovic chuan Paris Masters quarterfinal an lut a, ninganiah set hloh lovin Fabio Fognini leh Damir Dzumhur an hneh ve ve.

World number three Federer chuan darkar khat leh minute 13 chhungin 6-4 6-3 in Italian Fognini a hneh a, a vawi 100 nan ATP tour title la thei turin French khawpuiah hma lam a pan zel.

Kum 37 mi Federer hian chawlhni liam taah a vawi kua nan Swiss Indoor title a la a, ATP Tour a khelh chhung trophy 99 a lakna niin beiseina sang tak nen Paris-ah hun a hmang mek a ni.

Second seed Djokovic chuan Bosnian Dzumhur-a lakah awlsam takin hnehna a chang ve thung a, set hmasa ber 6-1-a a lak hnuah set hnihnaah 2-1 in hma a hruai a, hnungzang hliam vangin Dzumhur a inhnukdawk a ni.

Kum 31 mi Djokovic hian ranking tharah Rafael Nadal luahlanin world number one a luah dawn a, a pum a that loh vangin Nadal-an Paris Masters a khel thei lo a ni.

Wimbledon leh US Open champion Djokovic chuan Paris-ah rin a kai a, quarterfinal-ah Marin Cilic nen an inkhel ang. Cilic hian 7-6 6-4 in ninth seed Grigor Dimitrov a hneh a, vawi khat a chak leh a nih chuan season kharna ATP Finals-ah a tel thei dawn a ni.

Share post:
avatar
  Subscribe  
Notify of