Federer-a record khum duhnain Djokovic a tiphur

Federer-a record khum duhnain Djokovic a tiphur

Record siama Australian Open champion a nih hnuah Novak Djokovic chuan chona hmachhawn zel a inhuam a, Grand Slam title 20 vaw chhuak turin phurna a nei sang hle.

Kum 31 mi Djokovic hian chawlhni khan Melbourne Park-ah final khelin, 6-3 6-2 6-3 in tunlaia a elpui lian Rafael Nadal a hneh a, a vawi 15 nan Grand Slam-ah a champion.

Mipa zinga Grand Slam-a champion hnem pathumna a ni a, record siamtu Roger Federer chuan trophy 20 kawlin vawi 17 Nadal a champion tawh bawk a ni.

Mipa zinga Australian Open-a vawi sarih champion hmasa ber a ni nghal a, Grand Slam hnuhnung vawi thumah champion vek bawkin hlawhtlinna ropui leh sang zawk thawk chhuak zel turin inringtawk zui hle a ni.

Djokovic chuan Grand Slam title la hnem ber nih theih a duh a, thil hlu bik tak a nih avangin phurna pawh a neih phah tih a sawi.

Federer-a champion zat tluk turin trophy panga neih belh a la mamawh a, Grand Slam tournament chu tennis huanga inelna lian ber a ni a, tun season leh season lo awm zel turah pawh a ngaih pawimawh ber a ni zel dawn tih a sawi a, season eng zat nge a la khelh dawn tih tunah a sawi thei lo va, thui tak ngaihtuah erawh a tum lo tih a sawi nghal a ni.

Thawhtannia tihchhuah world ranking tharah Djokovic hian number one a humhim zui zel a, nikum November atang khan dinhmun sang ber a luah tawh a ni.

May-ah French Open khelh a ni dawn a, a champion thei a nih chuan open-a tennis kalpui a nih atanga mipa zinga Grand Slam tournament palia vawi hnih champion kim hmasa ber a ni ang.

Share post:
avatar
  Subscribe  
Notify of