Feb 5 atangin Zothan Autoworks LPS Pro Fight

February 5-ah R Dengthuama Indoor Stadium-ah Zothan Autoworks LPS Pro Pro Fight tan a ni dawn a, a vawi khat nan India hmar chhak state dang atangin boxer tha an tel ang.

Nikum November 10 atanga tan turin Pro Fight vawi riatna kalpui a ni tawh a, mahse, a khelhna hmun turah harsatna a awm. Mizoram Assembly Inthlanpui vote chhiar nan R Dengthuama Indoor Stadium hman a nih avangin Pro Fight khelh hun sawn hlat a ni.

Vawiinah chairman Pu Lalsawmliana Pachuau hovin LPS Office-ah Organising Committee a thukhawm a, February 5-ah R Dengthuama Indoor Stadium-ah Pro Fight tan turin thutlukna a siam a, kum kal taa tel tuma form theh luh tawhten a thara tih ngai lovin an ring nghal thei a, tel duh si entry form la theh lut ve lo tan kar khat chhung hawn a ni ang.

January 14, kar leh thawhtanni atangin LPS Office, Zarkawt atangin tel tum tan Rs 10-in form a lak theih dawn a, January 19, kar leh inrinni thlengin theh luh theih a ni ang.

January 31, zing dar 7 atangin Hawla Indoor Stadium, Republic Vengthlangah tel tum zawng zawngin medical test hmachhawnin an inbuk dawn a. Nikuma form theh lut tawh leh kar leha form theh lut thar zawng zawng kim taka kal tur a ni.

Tun tum Pro Fight-ah hian a vawi khat nan hmar chhak state dangte tel tura sawm an ni a, weight hrang pangaah boxer pakhat theuh tel thei tura tih an nih angin Manipur atangin boxer panga beisei an ni a, Assam leh Meghalaya pawhin boxer an rawn tir ngei tura ngaih a nih bakah state dang atang pawhin tel thei tura beisei an ni.

Share post:
avatar
  Subscribe  
Notify of