Eiruknaah an fihlim leh fihlim loh Zoramthanga leh Dr. Thangtea te’n puang rawh se

Eiruknaah an fihlim leh fihlim loh Zoramthanga leh Dr. Thangtea te’n puang rawh se

LUNGLEN BUREAU, October 9
Mizoram Pradesh Youth Congress Committee (MPYCC) chuan, chief minister Zoramthanga leh cabinet minister Dr R Lalthangliana te chu eirûk thubuai nei mek an nih thu sawiin, corruption laka an fihlim tak tak a nih chuan Lal Thanhawla angin an fihlimzia mipui hmaa puang turin an phût.

MPYCC chuan, election affidavit dik lo thehluta Lalhriatrenga Chhangte-in Lal Thanhawla a puhna thubuaiah October 3, 2019-a Serchhip District Court-in Judgement Order a tihchhuahah Lal Thanhawla chuan thiam a chang tih an sawi a; Kau-Tlabung chungchanga eirua puhnaah pawh kum 10 chhung chhui a nih hnuin February 26, 2010-ah Aizawl District Court special judge T Saikunga’n Lal Thanhawla chu thiam a chantir tawh tih an tarlang.

Congress party ṭhalaite chuan, “Pu Lal Thanhawla hi dâwtin chhe tak takin hêkin puh ṭhin mah se, diknain hmun a chang leh ṭhin hi Congress ṭhalai chuan lawmawm kan ti a, Pu Hawla hnehna hi kan chhuang tak zet a ni,” an ti.

MPYCC chuan, Lal Thanhawla chu lepsè ngam, Court hmaa koh kal theih leh corruption laka fihlîm a ni tih sawiin, “CM Pu Zoramthanga leh minister Dr R Lalthangliana, eiruk thubuai neia puh mekte pawh, Pu Hawla anga huaisen taka a hun taka Court rorelna ngai pawimawha zah thiam tur leh Court hmaa inlan ve ngam a, an fihlîm tak tak a nih chuan corruption laka an fihlimzia Zoram mipui hmaa puang ve turin kan phût a ni,” an ti a; Mizoramin Lal Thanhawla ang ram hruaitu, lepsè ngam a nei ṭhin chu vanneihthlak an tih thu an sawi a ni.

Share post:
avatar
  Subscribe  
Notify of