Doctor specialist dah loh chuan Champhai zirlaiten zirna in khar, kawngzawh leh bandh tintuah

Doctor specialist dah loh chuan Champhai zirlaiten zirna in khar, kawngzawh leh bandh tintuah

LUNGLEN BUREAU
Aizawl, September 25, 2018
MZP Hqrs., Champhai chuan sorkar dilna an lo thlen tawh thin, Champhaia Doctor specialist (Orthopaedic Surgeon leh Ophthalmology) chu tun thlenga sorkarin a ngaihsak loh zel avangin dawr leh an tum a, an hlawhtling lo a nih chuan zirna in khar, kawng zawh leh total bandh neih thlengin an intintuah mek.

Vawiina thuchhuah an siamah Champhai MZP chuan an dilna ngaihthlaksak an ni lo chu na an tih thu leh Champhai chu sorkarin a ngaihsak lo bik nia an hriat thu an sawi a. “Sorkar hi dawr leh phawt ni se, thu lawmawm lam kan hre lo a nih chuan hetiang hian ruahmanna siam,” tiin Zirtawpniah bank leh OPD huam lova zirna in leh sorkar pisa khar vek ni se an ti.

An la hlawhtling lo zel a nih chuan karleh Thawhtanni (October 1)-ah kawngzawhna an tum a, college leh higher chinten Vengsang leh Bethel kawn atanga kawngzawha DK Point-ah innghahkhawm turin ruahmanna an siam a. Heti pawha an la hlawhtling lo a nih chuan a tul anga total bandh neih chhunzawm an tum bawk.

He an hmalakna kal mek chhung hian DC Office-ah chhun zan zawmin an vil dawn bawk tih an sawi a. An thu bawhzui hian vawiin hian Vice President leh Secretary chuan Aizawl an pan tih an sawi bawk.

Champhai MZP hmalakna chungchangah hian PRISM District Hqrs., Champhai pawhin thuchhuah siamin an thlawp thu an sawi a, “Khawchhak lama Mizote khawpui ber leh Zo hnahthlakten kan pan khawm ber, Champhai District Hospital-a kan mamawh, Orthopaedic Surgeon leh Opthalmology te hi a rang thei ang bera sorkarin a dah vat kan phutpui,” an ti.

Share post:
avatar
  Subscribe  
Notify of