Doctor ngiatin Champhai MZP-in zirna in khar, kawngzawh leh bandh huaihhawt dawn

Doctor specialist dah loh chuan Champhai zirlaiten zirna in khar, kawngzawh leh bandh tintuah

LUNGLEN BUREAU
Aizawl, September 27, 2018
MZP Headquaters Champhai chuan chuan sorkara dilna an lo thlen tawh thin, Champhaia doctor specialist (Orthopaedic Surgeon leh Ophthalmology) chu tun thlenga sorkarin a ngaihsak loh avang leh vawiina Health Minister an hmuh hnuah pawh an lungawina tur thu an dawn loh avangin an lo inruahman tawh angin zirna in leh sorkar pisa khar, kawng zawh leh total bandh neih tlang an tum.

Champhai MZP hian vawiin chawhma khan Health Minister Lal Thanzara chu hmuin Champhaia doctor chungchang hi an sawipui a, Health Minister chuan, “Champhaiin doctor chungchanga in harsatna chu kan hria a, Mizoramah doctor kan indaih lo hle a, theihtawp kan lo chhuah ang a, kan lo bawhzui dawn a nia,” tiin a chhang a ni.

Minister-in a lo chhan danah an lungawi zawh loh thu Champhai MZP chuan thuchhuah siamin an tar lang a, “Hun hun rei tak kan ngen tawh chunga ngaihtuah mek a la ni chu pawi kan ti a, lungawina tur kan hmuh loh avangin an inruahman lawka kal kan tum,” an ti a. Vawiina Health Minister an hmuhnaah hian MZP General Hqrs atangin President L.Ramdinliana Renthleiin a tawiawm nghe nghe.

An inruahman dan chuan naktukah hian bank leh OPD huam lova zirna in leh sorkar pisa khar vek an tum a. An la hlawhtling lo a nih chuan Thawhtanniah kawngzawhna an tum a, college leh higher chinten Vengsang leh Bethel kawn atanga kawngzawha DK Point-ah innghahkhawm turin ruahmanna an siam a. Heti pawha an la hlawhtling lo a nih chuan a tul anga total bandh neih chhunzawm an tum bawk.

Share post:
avatar
  Subscribe  
Notify of