District ngiat mek khaw pathumah sorkarin Treasury Office a hawng

District ngiat mek khaw pathumah sorkarin Treasury Office a hawng

LUNGLEN BUREAU
Aizawl, October 4, 2018
Mizoram sorkar chuan district ngiat mek pathum – Saitual, Khawzawl leh Hnahthial khuaah te Treasury Office hawn a nih thu vawiin khan hriattirna chhuahin a puang a, sorkar kum tharatanga hna thawk tan chauh tur an ni thung.

Finance Department Principal Secretary Lalnunmawia Chuaungo chuan hriattirna chhuahin tun hnaia Council of Ministers thukhawm thutlukna lo siam tawh angin khaw pathumah hian Treasury Office hawn nghal tur a nih thu a sawi a, Treasury Office hawnte hi sorkar kum thar atanga a taka hna thawk tur an nih thu pawh a tar lang bawk.

Sorkar thuchhuahah chuan heng Treasury Office hawn tak pathuma sorkar pawisa khawihtu tur, Drawing & Disbursing Officer (DDO) te chu hriattirna dang chhuaha puan leh tur a ni tih tar lan a ni bawk.

Tun dinhmunah hian Treasury Office pahnih nei district chu pahnih an awm mek a. Aizawlah South leh North Treasury awmin Lungleiah Lunglei leh Tlabung Treasury a awm bawk. District dang 6-ah erawh chuan Treasury pakhat theuh a awm thung.

Share post:
avatar
  Subscribe  
Notify of