Dikna a dingchang thin: Lal Thanhawla, MPCC President

Dikna a dingchang thin: Lal Thanhawla, MPCC President

October 4, 2019 khan Congress Bhavan Golden Hall-ah MPCC buatsaihin India Hnam Pa Mahatma Gandhi piancham puala hun hman a ni a, thusawitu MPCC President Pu Lal Thanhawla chuan, “MNF President Pu Zoramthanga’n jail a min tan tir ngei tumin kum 10 zet a bei a, thuhretu 40 chuang leh document thingrem khat an nei chungin Judge-in ka dik lohna a hmu lo tiin ‘dikna a dingchang thin'” a ti.

MPCC President chuan Rev. Zairema leh Pu Bualhranga ten jail-a min tantir tumin nasa takin an bei chungin, ka dik lohna Court-in a hre chuang lo. Tunah Pu Hriata Chhangte-in jail-a mi tantir ngei tumin min bei leh a, mahse, Pathian khawngaihna a zarah thiam ka chang leh a. A zarah experience ropui tak neiin, court chhunga thubuai neite an dintirna hmunah vawi 2 vawi 3 hial ka din phah a. Judge-in thutna min pek a tum pawhin duh lovin, darkar 1 chuang ka ding a ni” a ti.

Kolkata-a in a neih chungchang sawiin, “West Bengal Communist sorkarin duhsak taka ram tih hlut nana prominent citizen-te hnena an pek anga ram min pe ve hi ka chhuangin ka lawm takzet a. Amaherawhchu, a pek liau liau a min pek mah ni se, ram neitu nihna tak tak nei turin cheng nuai 17.3 vel chu ka seng tho a ni. Chutiang a ni chung chuan, Pu Hriata Chhangte hian hralh suma chantira a man tur zat (a market price) lo hisapin cheng vaibelchhe 3 man vel niin a sawi lui ngar ngar thung” a ti bawk. Tin, Pu Hriata Chhangte chuan Central sorkar hnuaia a thawh laia Mizorama lo chhuah a, Department head nih a ngen tuma a thawhpui turten an duh loh avanga tihhlawhtlin theih a nih tak loh chungchang leh, Serchhip-a a u nen MLA election-a vawi 3 ngawt an lo inkhin tawhna vangte a nih ngawt loh chuan mimal a mah a huat em emna chhan tur a hriat loh thu a sawi a. Pu Hriata Chhangte u, College zirtirtu pawh Principal a nih theih na kawngah dodalna a siam duh miah loh thu leh, transfer tura rawtna a awm pawha a phal loh zawk thu a sawi a ni.

Pu Lal Thanhawla chuan Serampore College-in Doctor of Divinity an pek chungchang sawiin, “Serampore College Principal-in min rawn phone a, lehkha min rawn thawn bawk a. I pawm leh pawm loh min hriattir la an ti a, phu lo hle mah ila pawm loh chi a ni lo a, inthlahrung tak chungin ka pawmna lehkha pawh ka thawn let tawh a ni. He chawimawina ka dawn tur hi nasa taka min tawngtaipui thintu Mizoram mipuite vang a ni a, min tawngtaipui zui zel turin mipuite ka ngen a ni” a ti.

Share post:
avatar
  Subscribe  
Notify of