Dik tak leh rinawm takin politics a khel theih : Chalrosanga, MLA

Dik tak leh rinawm takin politics a khel theih : Chalrosanga, MLA

LUNGLEN BUREAU
Aizawl, September 28, 2018
Vawiin khan Lunglei Bazarveng Community Hall hawn chu Bialtu MLA Chalrosanga Ralte-in a hawng a, thu sawiin, “Miten politics hi kal dik lo viau leh tha lo viauin sawi thin mah se, dik tak leh rinawm takin politics hi a khel theih a ni,” a ti.

P.C.Zohmingthanga, VCP, Bazarveng kaihhruai hawnna inkhawmah Chalrosanga Ralte chuan kum 2013 inthlana a thusawi bawhzuia hun rei tak atanga an lo beih tawh hawn a lo ni ta chu a lawmpui thu sawiin bul tantu, Bialtu MLA hmasa hnenah leh Bazarveng mipuiten theihtawp an chhuahna leh in pekna lawmawm a tih thu a sawi.

Bialtu MLA chuan Bazarveng VC leh khawtlang nu leh paten vengin a mamawh, Higher Secondary School din a nih theih nana hma an la leh bul tan nan sum leh pai an ui lo chu lawmawm a tih thu sawiin, “Bazarveng Higher Secondary School building sakna tur, Bazarveng M/S bul pawh approved a nih tawh,” a ti a. A sakna tur chu UD&PA Minister-in a tiam tawh angin Rs. Nuai 80 project siam a nih thu leh file a kal mek thu a sawi bawk.

Mavala chuan a theih ang tawka mipui rawng a bawl thu sawiin tanpuina dil a lo chhan danah te, a hmalaknaah mi lung tihawi lohna a nei a nih chuan mipui ngaihdam a dil a. A bial chu nuam a tih thu leh bial chhung hmasawnna atana theihtawp chhuah reng a inhuam thu sawiin inthlan leh turah Lunglei West biala a ding leh a nih chuan theihtawp chhuahpui turin mipuite a sawm bawk.

Bialtu MLA hian hall thar hawn lawmpui nan Br. YMA, Bazarvengin an mamawh, Pic up leina tur Rs. Nuai 4 an dil chu lawmthu sawi nan a pe nghal bawk.

Lalrammuana Chawngthu, President, Br. YMA pawhin thu sawiin kum 1998 atang Hall hi buaipui a nih thu sawiin a hmun neih a nih theih nana kawng hial an zawh thu a sawi a. Kum 20 hnua an lo beisei leh theihtawp chhuaha an lo sual hawn theiha a han awm ta chu lawmawm a tih thu a sawi bawk.

K.Lalhmingliana, Secretary-in report pein kum 1998 atanga sak tan niin khawtlang leh YMA ten sum leh pai leh hnatlanga tha an thawh thute a tarlang a, a sak nan Rs. Nuai 100 zet sen a ni a, a dung 59 feet leh a vang 46 feet-a zau a ni.

Share post:
avatar
  Subscribe  
Notify of