Cooperation Minister-in Mamitah ARCS office thar hawng

Cooperation Minister-in Mamitah ARCS office thar hawng

LUNGLEN BUREAU
Aizawl, September 18, 2018
Vanlalawmpuii Chawngthu, Cooperation Minister chuan vawiin khan Mamit district mipui, a mamawh a piangte hman turin Assistant Registrar, Cooperative Societies (ARCS) office thar, Mamit Field vengah a hawng.

I&PR Conference Hall-a hawnna inkhawm neihah Vanlalawmpuii chuan Mamit chu Aizawl West leh Kolasib atanga kawp a nih avang leh office dawrtute mamawhna chhawk a nih theih nana office thar hawn a ni ta chu hmasawnna lawmawm tak a nih thu a sawi a. Thawktute chu mipuite tana dawr nuam tak nih tuma an tih theih bak a awm pawha tawngkam hawihawm taka thlah thin turin a chah.

Mipuite chu ram hmasawnna leh rorelna dik kengkawha sorkar tha siam turin theihna zawn theuhah tangkaina an nei a ni tih hriaa sorkar khalh ngil tura an pawimawhna an hriat a pawimawh thu a sawi a, ram leh hnam tana theihtawpa tang turin kalkhawm mipuite a sawm.

Vanlalawmpuii chuan Mamit district chu hmasawnnain a paltlang tih sawiin tun hnaia sorkar office pawimawh tak tak hawn a ni chu lawmawm a tih thu a sawi a. Faina kawngah an hma a lakna chu chhunzawm zela district khawpui fai an nihna chu India ram pum inelnaah pawh lawmman la thei tura tang chhunzawm turin a sawm bawk.

Assistant Registrar, Cooperative Societies, Mamit-ah hian thawktu ARCS, JRCS, UDC, LDC, Gr-IV an vaiin mi 5 an awm a. Office building hi Mamit Field veng-ah P.C.Lalbiakdika in luah hawh rih a ni.

ARCS Office hawn thar pual inkhawm hi B.Lalhmingthanga, Secretary, Govt of Mizoram, Cooperation Department-in kaihruaiin Cooperation-in a thawh ber chu department dangte leh society-te nen tang tlanga mipuite ei leh bara an intodelh nana tanpui a nih thu a sawi a. Lo neih lamah leh sumdawnnaah Mizoramah society changtlung tak tak din a nih tawh thu a sawi.

He hunah hian Mamit khawpui chhunga sorkar department aiawh, tlawmngai pawl hrang hrang aiawh leh thuthar thehdarhtute an tel.

Share post:
avatar
  Subscribe  
Notify of