Comedian Search Second Round zo ta

Comedian Search Second Round zo ta

ZIPRO LPS Comedian Search chu Second Round an zo fel leh ta; Zirtawpni leh Inrinni zan khan fiamthu thiam 26 an inel a, a tlingte hi October ni 12 leh ni 13 zanah an inel leh dawn a ni.

Mi 90 chuangin tun tumah hian hming an pe a, mi hriat hlawh sa an awm nual. Judge pathum H Rotluanga, Mafaa Hauhnar leh Lalhruaitluanga Chawngte te’n an endik a, host thar Daisy Zorammawii’n a kaihruai a ni.

First Round leh Second Round-ah fiamthu thiamte an tha tlangpui a, mipui an chawk hlim tha hle. Kumin hian tunlaia politics titi zulin fiamthu a piang a, ‘show cause notice’ inpe leh chhang duh lo fiamthu ngaihthlak tur a awm zeuh zeuh!

Tum dang ang bawkin zahmawh rawngkai fiamthu thawh an phal lo a, Second Round thleng chuan hei hi fiamthu thiamte’n an zawm tha.

“Kan contestant-te an fakawm a, an tha tlang hlein ka hria. Mipuiin lo hlimpui se kan duh a, mipui pawhin an lo hlimpui tih kan hria a, kan lawm khawp mai,” chief organiser H Rotluanga (Mapuia) chuan a ti.
“Fiamthu chawisan, fiamthu thiamte platform siamsak hi kan tum pawimawh pakhat a ni a, mipuiin hlimpui se tih hi kan tum pawimawh a ni bawk a. Fiamthu thiamte an that em avangin mipuiin an lo hlimpui ve thin a, kan lawm khawp mai. Sawiselna tur a awm ang a, chuti chunga mipuiin an lo ngaihlu der ve thin hi kan lawm tak zet a ni,” a ti bawk.

“Mipuiin TV kan enho a, kan nuiho hi a hlawhtlinnaah kan ngai a. Miin an lo hlimpui a, hlim lote an lo nui tih te kan hriat hian kan lawm a, chhungkuaa TV enho ngai lote’n Comedian Search an enho tih te kan hriat hian kan lawm a, hei hi mi titangtu pawh a ni,” a ti bawk.

Kumin hian TV lama mipui hmelhriat sa Daisy Zorammawii’n a host a, ‘experience’ a nei tawh tih a lang a, thlirtute ngainat pawh a hlawh. Han sawi mai tur a hre ve mai thin thin te leh contestant-te fiamthu-ah za em ema a lo nui ve thinte chu show tinuamtu a tling ve awm e.

Judge thang zingah Stephen Auhmun a tel lo a, thlirtute lamah Auhmuna nui huah huah ri hriat tur a awm lo, lo ui an awm. Auhmuna tel loh thu pawh hi an tan hma hauh atangin tunlai politics titi nen social media lamah tute emawin an lo phuah khawm a, ‘show cause notice’ an pek vanga tel lo anga Auhmuna sawina chu Comedian Search fans te tihlimtu a tling.

Share post:
avatar
  Subscribe  
Notify of