Chul tawh leh Hnah thar: Jose Mourinho leh Mauricio Pochettino

Chul tawh leh Hnah thar: Jose Mourinho leh Mauricio Pochettino

LUNGLEN SPORTS BUREAU

Tottenham Hotspur-in an buzawlah Manchester United luhchhuahin si thum faiin an hneh. Inkhelh zawhah manager pahnih an inchibai a, an inkuah zui bawk. Commentator chuan ‘Past and Future’ tiin tawi tê si, awmze nei zetin mi pahnih awmzia a sawi fiah.


Khawvel football manager ṭha ber pawla ngaih ṭhin Jose Mourinho-a ropui hun a liam tawh a ni maithei ? He Portuguese hian phui taka goal ven hlawhtlinpuiin Champions League-ah Porto leh Inter Milan a champion-pui a, Chelsea-ah a hlawhtling viau bawk.

Mahse, Real Madrid a enkawl aṭangin a fuh lo chho ṭan a, a khelhtir dan bakah player nen an inkarah khi a awm a, media lakah lungawi lovin inkhelh dawn leh zawha Press Conference an neih ṭhin chu ama tawkin a dodal a, a inlan duh lo fo mai.

Real-ah hian kum li daih contract ziak mah se kum thum a hmang zo hram a, an ban. La Liga title vawi khat a lakpui bak chhuan tur teh vak a nei lo va, a chhuah hnuah Real-in Champions League trophy vawi li an la tawh.

A ropuina Chelsea-ah a kir a, season hnihnaah league title lakpuiin chawimawiin a awm thar leh. Mahse, season thum a enkawlnaah an che chhe em em a, season chanve thlengin table mawng lamah an inham buai. Neuh neuh a tam hle a, an ban.

Man Utd-in an ruai ve leh a, goal veng ringawt an duh loh thuin an vau lawk hle nghe nghe. Season hmasa berah 6-na a nihpui a, sum hlawm hmangin season hnihna, season liam ta maiah 2-na an ni a, hma an sawn. Club a enkawlah season hnihna a hman ruala champion thei tura ngaih leh amah pawhin a sawi ṭhin dan a ni. Mahse, Man Utd-ah Mourinho-an league title a lakpui zo lo.

A khelhtir danin United tantu tam tak a tihnual a, sum hmanga team siam ṭhat tuma club hotute a nawr danah boruak a awm hle bawk. Mourinho-a khelhtir dan leh a kalphung chu tunlai football-ah a ṭha tawh lo va, mahni tawka luhlul ve tak leh thurawn pawisa lo tak a nih bawk si avangin a hun a liam tawh niin football expert-te chuan an sawi nasa.

Chul tawh leh Hnah thar: Jose Mourinho leh Mauricio Pochettino 1

Season tharah United-in league vawi thum khel tawhin a tir berah an chak a, a hnu vawi hnihah goal thum chhuah zawnin an tlawm a, 13-naah an inhung. Real leh Chelsea angin Mourinho hi United-in season thumnaah an ban ve mai ang em ?

Tottenham erawh league khelh thuma chak vek thei team pali zingah an tel a, table-ah pahnihna an ni.Tun nipui bazarah khan Tottenham manager Mauricio Pochettino chuan player pakhat mah a lei ve lo.

English Premier League chanchina player lei miah lova nipui bazar hun hman ral hmasa ber a ni nghe nghe. Chuti chungin Pochettino chuan vawi khat pawh club hotute laka a lungawi loh thu a sawi lang lo va, a squad neih sa an ṭha tawk a, hma an sawn zel dawn a, a ring tawk tih a sawi mai.

He Argentine coach hian English team a enkawl aṭangin league title lak la nei lo mah se player a neih leh a lak khawmte ṭha takin a hmang a, football hmuhnawm tak khelhpuiin a chet danah fak a hlawh a, a hnen aṭangin thil ropui zawk a chhuah belh zel an beisei sang em em. Tottenham a siam lian a, tun kum thum chhung velin league title beisei ngam tura ngaih zingah an tel chho ziah.

Spurs hian Stadium thar an sak mek avangin sum an hmang tam a, Pochettino-an a duh zawng player lei turin sum a nei thei lo. Mahse, a kawl mekte a ṭha thei ang bera hman chhuah tumin a bei a, Mourinho angin player a lei theih loh avangin a vui ve lo va, mahni inthiarfihlim nan club a dem ve hek lo.

Pochettino hi hun lo la awm tura manager ropui ber pawl ni thei tura an beisei a ni a, tuna pangin manager tha ber pawl a ni tawh a, manager la naupang zinga hmabak nei êng ber pawl a ni bawk.

Share post:
avatar
  Subscribe  
Notify of