CHHIM LAMAH MYC HMUNPUI: IBPS prelims leh MPSC Combined Competitive Exam 2018 prelims-ah Southern Zone zirlai 30 inziak tling

CHHIM LAMAH MYC HMUNPUI: IBPS prelims leh MPSC Combined Competitive Exam 2018 prelims-ah Southern Zone zirlai 30 inziak tling

LUNGLEN BUREAU
Aizawl, October 2, 2018
Mizoram Youth Commission Chairman Joseph Lalhimpuia chuan Mizoram chhim lam tana MYC hmunpui tur, MYC Southern Mizoram Zone chu Top Floor, SSA Office, Venglai, Lungleiah vawiin khan a hawng a. MYC Southern Mizoram Zone hnuaia zirlaite zingah hian IBPS prelims exam-ah mi 25 leh MPSC Combined Competitive Exam 2018 prelims-ah mi 5 an inziak tling tawh.

Thangropianga, DLEO, Lunglei district kaihhruaia chhim lam tana MYC hmunpui tur hawnna inkhawmah hian MYC Chairman chuan MYC Southern Mizoram Zone chu chhim lam mipuite, a bik takin thalaite tan kawng engkima hmasawnna thlentu a nih ngei a beisei thu leh lehkha zirna leh eizawnna kawng inkawhhmuhna hmunpui tura ruahman a nih thu sawiin, “Thalai tam zawkten tumruhna nen hlawhtlinna an hmuh ngei kan beisei a ni,” a ti.

MYC Chairman chuan thalaite khawvel zauh kawngah MYC-in theihtawp a chhuah mek zel tih sawiin Central IAS Online Coaching leh SSC Coaching siam a nih thu te, thalaite tana mi entawntlak leh entawn tur thlan chhuah, Young Achiever’s Award 2018 buatsaih a nih thu te, Incentive Cash Award pek chhuah mek zel a nih thu te, Mizo thalaite an inpumkhatna tura hmalakna, Kohhrana thalai pawl hruaitute tan India rama Kohhran hmun pawimawh hrang hrang tlawh theih nan Exposure Tour programme siam a nih thu te, District tinah Youth Centre changtlung tak buatsaih a nih tur thu te, Mizoram mawina leh hlutna khawvel hmuha pho chhuah a, tourism tihmasawntu a lo nih theih nan photographer-te nen tangkawpa hmalak tum a nih thu te a sawi.

Khualzahawm, MYC Founder Chairman Z.H.Ropuia chuan MYC din dan chanchin tlangpui sawiin he commission din tura vawi tam tak sorkar laipui hotute an dawr thu leh Mizoram Youth Commission Act, 2008 duang dan chanchin kalkhawmte a hrilh a. MYC kal zelna turah duhsakna a hlan bawk.

MYC Southern Mizoram Zone hnuaiah hian UPSC Online Coaching (ALS), SSC Coaching, IBPS (Banking), NEET leh IIT-JEE Coaching-te kalpui mek niin thalai 500 chuang zirlai leh sipai tan tumte training leh zirtirna pek mek zel an ni a. An zirlaite atangin IBPS prelims exam mi 25-in an paltlang a, MPSC Combined Competitive Exam 2018 prelims-ah mi 5 inziak tling tawh bawkin UPSC leh SSC zirlaite pawh an inpuahchah mek zel bawk.

Vawiina MYC Southern Mizoram Zone hawnna inkhawmah hian MYC member Prof. J.Zorema bakah sorkar official, Lungleia prominent citizen leh MYC hnanthawktute leh zirlaite an tel.

Share post:
avatar
1 Comment threads
0 Thread replies
0 Followers
 
Most reacted comment
Hottest comment thread
1 Comment authors
Lalnunmawia Chhakchhuak Recent comment authors
  Subscribe  
newest oldest most voted
Notify of
Lalnunmawia Chhakchhuak
Guest
Lalnunmawia Chhakchhuak

Chhim zone tih hmingpu chu a thaem aw, te lo ti ve ngawt ila