Chelsea-in Morata chhuahtir, Hudson-Odoi chelh

Chelsea-in Morata chhuahtir, Hudson-Odoi chelh

Chelsea-in Atletico Madrid pan turin striker Alvaro Morata an chhuahtir a, hetih rual hian Bayern Munich dawrna hnawlin Callum Hudson-Odoi hralh an tum lo.

July 2017 khan Chelsea-in Real Madrid atangin pound maktaduai 60 sengin Spanish striker Morata an lei a, kum nga daih contract ziahpuiin an club chanchina player man to ber a ni.

Mahse, beisei a pha lo viau a, Premier League vawi 47 a khelh tawhah goal 16 a thun a, tun January bazar hun chhungin Atletico nen inremna an siam fel.

Spanish La Liga-a pahnihna ni mek Atletico hian season khat leh a chanve chhung Morata hi an hawh dawn a, chawlhni khan Madrid club-a lut turin medical a hmachhawn tawh a ni.

Kum 26 mi Morata hian January 5 khan FA Cup-ah vawi hnih a thun a, Nottingham Forest lakah si hnih faiin an chak a, Chelsea tana a khelh hnuhnun ber a ni.

Chelsea hian tlar hma lam tihchak nan Morata an chhuahtir hmain Uventus atangin tun season chhung Argentina forward Gonzalo Higuain an hawh fel tawh a, an duh chuan an lei zui thei dawn a ni.

German champion Bayern chuan Chelsea atangin kum 18 mi Hudson-Odoi lei an tum ve thung a, pound maktaduai 35-in an dawr.

Hudson-Odoi hian thla 18 chiah Chelsea-ah contract a nei tawh a, a beisei anga khelhna hmun a chan mumal loh avangin London club hnenah chhuah dilna a thlen tawh nghe nghe a ni.

Mahse, Chelsea chuan Hudson-Odoi-a hnenah tun bazar hun chhungin an hralh dawn lo tih an hrilh a, Bayern dawrna an hnawl nghal bawk.

Inrinni kal ta khan FA Cup-ah winger Hudson-Odai hian khel bawkin goal a khung a, si thum faiin Chelsea-in Sheffield Wednesday an hneh a ni.

Share post:
avatar
  Subscribe  
Notify of