Champhaiah zirlaite duh angin sorkarin mit lam thiam doctor dah dawn; zirlaiten an nawrh an titawp nghal

Doctor specialist dah loh chuan Champhai zirlaiten zirna in khar, kawngzawh leh bandh tintuah

LUNGLEN BUREAU
Aizawl, October 1, 2018
Mizoram sorkar hnena Champhai District Hospital-a doctor specialist pahnih, Ophthalmologist (mit thiam) leh Orthopaedic (ruh lam thiam) dah ngiata MZP Hqrs., Champhaiin nawrhna an huaihawt chu sorkarin mit lam thiam doctor specialist dahna tur notification a tihchhuah tak avang leh ruh lam thiam pawh remchang hmasa bera dah a tum tak bawk avangin vawiin tlai dar 2:30 khan an titawp.

Mizoram sorkar hian Champhai District Hospital-ah hian Dr. Zosangzuala, Ophthalmologist chu Civil Hospital, Aizawl atanga dah turin notification a tichhuak a. Orthopaedic erawh Mizoram pumah specialist 8, MIMER-ah pahnih, Civil Hospital, Aizawlah pathum, Lunglei, Kolasib leh Siahaah pakhat theuh chauh an awm avangin Champhai MZP hian lak pen theih niin an hre lo va, remchang hmasa bera Champhaia dah tura inremna ziah a nih theih bawk avangin lungawilohna an lantir mek hi an titawp ta a ni.

Inremnaah hian Champhai DC Dr. Naveen Aggarwal, IAS; Champhai SP Lalthiamsanga Sailo, MPS ten sorkar aiawha hming ziakin zirlai aiawhin MZP President H.Lalramhluna leh SU Vice President Ralte Zodingliana ten an hming an ziak a. Pu Lalnunmawia, Ex-Principal, Govt. Champhai College-in hriatpuiin a hming a ziak bawk.

MZP Hqrs., Champhai chuan an thil nawr an kalpui leh a hlawhtlinna an hmuh chungchangah thuchhuah siamin sorkarin an thil phut a tihlawhtling chu lawmawm an tih thu an sawi a. Headquarters Champhai thuthmun Branch hrang hrang leh mipuiin an thlawpzia tilanga lungawi lohna an lantir ve avangin lawmthu an bawk.

District Hospital-a special doctor dah a nih theih nan hian Zirtawpni khan zirna inte kharin sorkar hnathawk pisa kai tur an dang a. Vawiin chawhmaah kawng an zawh a, zirna in kharin pisa kai tur an dan chhunzawm bawk a, hetiang pawha a hlawhtlin loh chuan total bandh neih thlengin ruahmanna an siam hman a ni.

Champhai District Hospital-a doctor dah belh phut hian nikum April 21 khan Champhai mipuiten Circuit House-a bungrua eng emaw zat tichhiain a hma niin DC Complex-a lirthei 5 an lo hal tawh bawk a ni.

Share post:
avatar
  Subscribe  
Notify of