Champhaiah Chhurbura Siktuithiang leh Chhurbura Tuichik hawng

Champhaiah Chhurbura Siktuithiang leh Chhurbura Tuichik hawng

LUNGLEN BUREAU
Aizawl, October 2, 2018
Chhura Hmun Welfare Committee, Bethel Veng Champhaiin Rs. Nuai 1.2 vel senga an siam, Chhurbura Siktuithiang leh Chhurbura Tuichik chu nimin tlai khan Pi Ethel Rothangpuii, Project Director, DRDA-in a hawng.

Khuallian Ethel Rothangpuii chuan Chhura Hmun veng mipuite thawhhona tha tak leh sorkar tibuai tlem thei ang bera Chhurbura Siktuithiang leh Chhurbura Tuichik an siam chu lawmawm a tih thu a sawi a. Mizo mipuiten khawtlang leh sorkara mawhphurhna neihte an hriatfiah a ngaih thu sawiin, Chhura Hmun Welfare Committee-ten mahni kutkawih hmanga hna an thawk thin chu Zoram mipuiten entawn se a duh thu a sawi a, an kalzelna turah duhsakna a hlan bawk.

Khualzahawm Dr. Lallawmkima, DIPRO. Champhai pawhin Chhura Hmun Welfare Committee hnathawh chu chhuanawm tiin, thil hawn thar takte chu veng chhung bakah Champhai khawpui chhawr theih tur a nih thu a sawi a. Welfare Committee-in veng chhung tihhmasawn, ruihhlo do, infiamna chawinung leh tanpui ngaite tana luanchhuahna an nei thin chu a fak a, khawtlang mipuite chu tawiawm tlat thin turin a chah.

Hawnna program Chhura Hmun, Champhai Bethel Venga neih hi Lucas Thangmangliana, Chairman, Chhura Hmun Welfare Committee-in a kaihruai a. F. Lalhriatpuia, Secretary, Chhura Hmun Welfare Committee-in report pein pawl hmalak tawhna leh hmachhawpte a tarlang a. Committee hi August 1, 2010 khan dinin chhungkaw 114, in 107 leh mihring 424 an awm mek a. Veng chhung hmasawnnate thawkin hmachhawp an nei nual bawk a. Ruihhlo do kawngahte, infiamna chawinung kawngah leh tanpui ngaite tanpui kawngah hma an la thin a ni.

Share post:
avatar
  Subscribe  
Notify of