Champhai daia Keilungliah lui khuaha Recreation Centre leh Dam Reservoir siamna tur lung phum

Champhai daia Keilungliah lui khuaha Recreation Centre leh Dam Reservoir siamna tur lung phum

LUNGLEN BUREAU
Aizawl, October 4, 2018
Non Lapsable Central Pool of Resources (NLCPR) sum Rs. Nuai 1988.00 senga Champhai khaw daia luang, Keilungliah lui khuaha Recreation Centre leh Dam Reservoir siamna tur lung chu vawiin khan Champhai North bialtu MLA T.T.Zothansanga’n a phum.

Khuallian chuan Keilungliah khuah a nih theihna tura lung phum theihna tura sulsutu sorkar official, khawtlang hruaitute, ram hlantute leh Champhai NGO Coordination Committee-te thawhhona chu a fak a. “Lung phum chu a bul tanna chauh ang a nih avangin a hlawhtlin theihna tura kan zavaia thawhho a ngai a ni,” a ti.

MLA chuan tun hnai kum 10 chhunga a bial chhunga inkalpawhna tha siam kawnga nasa taka hmalak a nih thu pawh tar langin, “PMGSY kaltlangin Rs. Nuai 12520 senga inkalpawhna siam that a ni,” a ti a. Champhai leh Seling inkar kawng double lane-a siamna tur chu DPR peih fel vek tawh, tender chhuah mai theih a nih tawh thu leh Rs. Vbc 137.47 senga Champhai leh Zokhawthar inkalpawhna siam mek a nih thu a sawi.

Champhai North bialtu MLA chuan khawpui kawng chei nan tun sorkar pawisa kum chhungin Rs. Nuai 165.75 dah a nih thu a sawi bawk a. A bial chhunga zirna in, RMSA leh school pangngaite thahnem tak sak a nih thu te, school 7 upgrade mai theiha kalpui mek leh Govt. Champhai College building Rs. Nuai 951 senga sak hawn a nih tawh thute a tar lang.

Power Sub-Station pahnih Keifangtlang leh Rabungahte hawn a nih tawh thu leh Hnahlan leh Rabung PHC hawn thar a nih bakah Champhai Session Court awm ta chu lawmawm a tih thu a sawi a. Champhaiin Auditorium a neih theihna turin hma lak anih bakah Zotlang Truck Terminal, Rs. Vbc 5 senga sak mek a nih thu a tarlang bawk.

Keilungliah lui khuah tur hi M/S S.S.Construction, Chaltlang Aizawlin a thawk dawn a, First Phase hmanga thawh turah lui khuah tur san zawng hi metre 20 niin, a thuthmun chhah zawng hi metre 14 leh a chung lam chhah zawng metre 4 a ni ang a, a hnuai thuthmun khuahna sei zawng hi metre 54.61 niin a chung lamah chuan metre 102.60 a ni ang a. A kamah kea kalna tur kawng metre 1.50-a zau siam tur a ni a, tlak danna siam tur niin a hmun panna kawng tha tak siam tur a ni bawk.

Keilungliah khuah hna hi March, 2020-a zawh tur niin tui litre nuai singthum leh sangnga vel tling tur anga chhut a ni a. Lui khuah hi Champhai khawpui tui mamawh phuhruk nan leh phaizawl buh leh bal chawm nan te, khualzin hipna tur, sangha khawina leh Champhai khawpui timawia boruak lum tiziaawm thei tura ruahman a ni.

Vawiin hun hi Er. J.Kapkima, EE, PHED, Champhai WATSAN Division-in a kaihruai a. Er.H.B.Chakma, SE, PHED, Champhai WATSAN Circle-in technical report a pe a. Sorkar departnment hotute, media, NGO leh khawtlang mipuite an tel.

Share post:
avatar
  Subscribe  
Notify of