Chakma 3-in zirlai an pawngsual dem; MZP-in Chakmate hnawh chhuah an nih theih nan hma la dawn

Chakma 3-in zirlai an pawngsual dem; MZP-in Chakmate hnawh chhuah an nih theih nan hma la dawn
LUNGLEN BUREAU
Aizawl, September 4, 2018
Mizo Zirlai Pawl chuan Mizorama dan lova lo lut ram dang mi, Chakmate chu dan anga hnawh chhuah an nih theih nan hma an la dawn tih an sawi a. Chamdur ‘P’ khuaa zirlai, Chakma foreigner-ten a chenna ina luhkhunga a hmai tuama in atanga pawt chhuaka an sawisak hnua an pawngsual zui chu MZP chuan an dem thu an sawi bawk.
Vawiina thuchhuah an siamah Mizoramah awihawm loh khawpin Chakma an pun thu leh ram dang atanga an luh dante Mizo mipuiin an hre vek tih sawiin, “Mizo hnam tana an hnawksak dan pawh tlang hriat a ni a, Mizote rilru tinatu a ni. Chutiang thilte ngaihtuaha chinfel a tul em em laia a ram neitu ni lo zawkte atanga kan ram ngeiah a ram neitu zawkin kut kan tuar a, pawngsual kan tawk hi Mizo thalaite rilru a dam thei lo a, Mizo thalaite hian na kan ti hle a ni,” an ti.
MZP thuchhuah chuan Chakmate hi dan lovin Bangladesh atangin an lo lut nasa hle tih sawiin an pung chak hle bawk tih an sawi a, “Kum 1901 chhiarpuia mihring 198 chauh awmin, tun dinhmunah chuan mi nuaikhat chuang an awm tawh,” an ti a. “Mikhual nih inhre lova an khawsa leh kan ram chhung ngeia a ram neitu Zofate chunga hlei an len thin hi MZP chuan pawi a ti a, kan mikhualten a ram leilung fa Mizote chunga harsatna an siam thin chu bansan tawh turin MZP chuan a hriattir,” an ti bawk.
MZP chuan Chakmate hi Mizoram atanga dan anga hnawh chhuah an nih theih nan hma an la dawn tih sawiin, “Hnam dang laka kan ram leh hnam humhalhna tur leh Zofate kan him zel thei hnan MZP chuan hma a la chhunzawm zel dawn a ni,” an ti.
An zirlaipui sawisaa pawngsualtu Chakma 3-te chu an phu tawk ang ngeiin hremna na tak pe turin MZP chuan thuneitute an ngen a, zirlai sawisaa pawngsualtu Chakmate an chunga hremna an pek dan chu an a enzui zel dawn tih an sawi bawk.
Lawngtlai district chhunga Chamdur ‘P’ khuaa hmeichhe zirlai hi kum 14 mi niin Vaseikaia Class VII zirlai, LIKBK sikula lut niin nimina Pang Zirlai Pawl thu chhuah chuan a tar lang a. Mi inluaha an unau a awm niin August 25, 2018 zan khan a lehkha zir zo chokaa awm chu Chakma 3 – Simon Chakma, 17; Sukromoni Chakma, 17 leh Tuitang Chakma, 20 te chuan luhkhungin a hmui an hupsak hnuah pawnah an pawt chhuak a, an pawngsual ta niin an sawi a ni.
ZPM Thalai pawhin an dem
ZPM Thalai pawhin Chakma pathum – Simon Chakma, Sukromoni Chakma, Tuitang Chakma ten a hmui hup chunga hruai chhuaka an pawngsual zui hi na an tih thu leh an dem thu vawiin vek khan an sawi a, thleng tawh lo tura an duh thu an sawi bawk.
ZPM Thalaite chuan thuchhuah siamin, “Kan mikhual Chakmate pawh mikhual an nihna anga mikhual nung chang pua awm hle hle turin leh Mizo thalaite thinrimna cho chhuak lo turin kan hriattir a. Kan sorkar chak tak pawh hian heng mi pathumte hi a na thei ang bera hremna pe turin kan ngen bawk,” tiin an thlir zui reng dawn tih an sawi bawk.
Share post:
avatar
  Subscribe  
Notify of