C.Ngunlianchunga’n a biala Paithar leh Saikahah Community Hall hawng

C.Ngunlianchunga'n a biala Paithar leh Saikahah Community Hall hawng
Paithar Community Hall

LUNGLEN BUREAU
Aizawl, September 27, 2018
Lawngtlai West bialtu MLA, AH & Vety Minister C.Ngunlianchunga chuan nimin khan a bial chhunga khaw pahnih, Paithar leh Saikah khuaa Community Hall sakte a hawng.

C.Ngunlianchunga chuan Mizoram hmun dang ang bawkin Lawngtlai West bial chhungah pawh zirna, hriselna leh ei bar zawnna kawngah sawrkar hma lakna leh hma sawnna hmuh tur tam tak a awm tih sawiin an sorkarin hna a thawhte chu a hmuh duhte tan hmuh hmaih theih a nih loh thu a sawi a. Mi retheite leh harsa zawkte khai chhuah nana sorkarin a ruahman, NLUP chu mi thenkhatin tihtawp tumin bei mah se uar zawka sem chhunzawm zel tum a nih thu a sawi bawk.

Minister chuan an sorkarna hnuaia Mizorama damdawi zirna hmasa ber hawn a nih thu leh Lawngtlaia CYLA khelmuala phullem phah thar a nih thu sawiin, Lawngtlai West bial tana hmachhawp awmte a tar lang a. Nalkawn-Chamdur Valley (NCV) kawng siam thatna tur NABARD loan atangin Rs Nuai 3400 pawm a nih thu leh kum 2018-19 chhungin Nalkawn atanga Tuithumhnar thleng tha taka siam a ni dawn tih a sawi.

Hei bakah hian Saikah, Paithar, Vanhne leh Rualkual ten an intawm tur ni tha (solar) hmanga Kurung lui tui lakna tur Rs Nuai 1150 pawh NABARD loan atang veka dah fel tawh a nih thu sawiin, hna pawh tender tawh niin, tan thuai theih beisei a nih thu a sawi bawk.

Paithar khaw Community Hall hi BRGF-NEDP convergence atanga sak niin BRGF atangin Rs Nuai 12 leh NEDP atanga Rs Nuai 10, a vaiin Rs Nuai 22 hman a ni a. A dung fit 70 leh a vang fit 40-a zau a ni ni a. Saikah Community Hall hi BRGF atangin Rs Nuai 10 leh BADP atanga Rs Nuai 10, a vaiin Rs Nuai 20 hmuh hmanga sak a ni a, kumin kum tir atanga sak tan niin a dung fit 60 leh a vang fit 30-a zau a ni ve a, Badminton khelh theihna tura siam nghal a ni.

Community Hall pahnih hawnnaah Lawngtlai DRDA Project Director R.Lalremsanga MCS; MDC, LADC Chairman V.Zirsanga; VCP; MDC, EM i/c LAD H.Chhuanawma te bakah YLA aiawhte pawh an tel.

Share post:
avatar
  Subscribe  
Notify of