Bru chhungkaw 42 te’n Lunglei district thleng

Bru chhungkaw 42 te'n Lunglei district thleng

LUNGLEN BUREAU, Aizawl Oct 7
Tripura Bru Relief Camp atanga Lunglei District-a Bru hruai kir hmalakna 1st Batch Repatriation team te chuan Inrinni khan Lunglei District tluang taka rawn thlengin nizan dar 7:20 pm khan an riahna hmun tur 2nd Bn MAP Hqrs, Luangmual an rawn thleng. 1st Batch Repatriation-a Lunglei District Bru rawn let te hi chhungkaw 42 niin an zavaiin mi 165 (Adult – 105, Minor – 60) an ni.

2nd Bn MAP Hqrs, Luangmual ah hian Lunglei DC Pi K. Lalrinzuali, SP Pu C.Lalthanmawia, 2nd Bn CO Pu Saidingliana, CMO Dr Thani Pachuau leh official engemawzatin lo hmuakin inkhawmna hun tawi neih a ni a. Evan C. Lalnuntluanga’n lawmthu sawi tawngtaina hun a hmang a ni.

He hunah hian Lunglei DC Pi K. Larinzuali chuan thu sawiin Bru repatriation chu sawrkarin a ngaih pawimawh takzet thu leh an chawlh lawkna (temporary shelter) leh an in sakna tur hmun House Plan Site te pawh mumal taka ruahman a nih tawh thu a tarlang. An chawlh lawkna (temporary shelter) ah hun rei tak an awm theih dawn loh avangin in sa tura hma la nghal turin Bru chhungkuate hi a chah nghal a ni. An khaw pana an kal zelnaah Police ten an ven chhunzawm zel tur thu leh hriselna lama harsatna nei te tan H&FW Department atanga duty an awm tur thu a tarlang bawk. Lunglei DC chuan Bru Repatriation-a mawhphurna hrang hrang nei te tawhrimna leh inpekna avangin 1st Batch Repatriation hlawhtling taka kalpui a ni chu lawmawm a tih thu sawiin an chungah lawmthu a sawi bawk a ni.

Bru chhungkua te hi sawrkarin in sa tura hma la thuai tura a duh avangin nimin khan chhungkaw tin hnenah in sa tura hmalak tanna tur Rs.25,000/- theuh leh an mamawh leina tur Rs.5000/- theuh pek an ni a. Tukin khan 2nd Bn MAP Hqrs, Luangmual ah zing tuk thuan ei pui an nih hnuah 9:30 am vel atangin anmahni khua theuh panin chhuah pui leh an ni. Chhungkaw 42 te hi khaw pali – Dinthar (chhungkaw 24 – mi 100), Putlungasih (chhungkaw 9 – mi 26), Buknuam (chhungkaw 6 – mi 28) leh Chawilung ‘S’ (chhungkaw 3 – mi 11) pan pui leh an ni.

Share post:
avatar
  Subscribe  
Notify of