BIATE-AH DIAMOND JUBILEE: Lehkha thiam phawtin, thiamna leh finnate khawtlang leh ramin a la mamawh dawn chauh

BIATE-AH DIAMOND JUBILEE:  Lehkha thiam phawtin, thiamna leh finnate khawtlang leh ramin a la mamawh dawn chauh

LUNGLEN BUREAU
Aizawl, September 25, 2018
Hrangturzo bialtu MLA, Vanlalawmpuii Chawngthu, Minister of State, Sericulture etc. chuan a bial chhunga Biate khuaah vawiin khan Government Eastern High School-in Diamond Jubillee an lawmna chu khuallian niin a hmanpui a. Zirlaite fuihin lehkha zir phawtin an thiamna leh finnate chu khawtlang leh ramin a la mamawh dawn chauh tih hriaa hmantlak leh chhawrtlaka zir chhuak phawt turin a chah.

Vanlalawmpuii Chawngthu chuan Biate chu zirna ngaisang khua a nih thu sawiin zirlai ni mekte pawh hian an hnungzuia khaw tihmingthatu nih tum turin a chah a. Zirlai naupangte chu an zirlai piah lam thil dangah inhman chin tawk hre tura chahin, “Lehkha kan zir phawt ang a, kan thiamna leh finnate khawtlang leh ramin kan la mamawh dawn chauh tih hriain, hmantlak leh chhawrtlaka kan zirchhuah phawt a tul a ni,” a ti.

Bialtu MLA chuan Mizorama khaw fai ber an nihna chu vawng nung zela faina avanga mite tlawh châk khua nih tum zel turin a ngen a. Fai ber lawmman lak beisei vang chauhva fai ni lovin, tun hma atanga khaw fai an nih avangin faina kawngah mite entawntlak ni zel turin duhsakna a hlan bawk.

Govt. Eastern High School hi kum 1958-a din a ni a, Diamond Jubilee lawmna hun hi Lalhmingliani, Headmaster-in a kaihruai a, school naupangten item chi hrang hrang entirin, zirtirtu lo ni tawhte pawhin thu an sawi a, khawtlang hruaitu pawl hrang hrangten hmanpuiin jubillee ruai an theh nghal.

Share post:
avatar
  Subscribe  
Notify of