Australian Open champion lai Wozniacki hnehtu Sharapova

Australian Open champion lai Wozniacki hnehtu Sharapova

Champion lai Caroline Woznicki hnehin Maria Sharapova chuan Australian Open fourth round a lut a, Serena Williams leh Simona Halep chuan third round an thleng.

Vawiinah Russian 30th seed Sharapova chuan a tir lamah a khel tha lo hle a, mahse, set thum an inbeih hnuah Wozniacki aia tlo zawk a nihna lantirin 6-4 4-6 6-3 in a chak a ni.

Kum 28 mi Wozniacki chuan set hmasa berah 4-1 in hma a hruai hman a, mahse, Sharapova chuan game nga la zawnin set a lak khalh. Set hnihnaah Wozniacki che tha zui mah se a tawp lamah kum 31 mi Sharapova chuan a nawr tawm let thei a, darkar hnih leh minute 24 an inkhel.

2008 khan Australian Open-ah Sharapova a champion tawh a, a vawi hnih nan trophy lak tumin hma lam a pan zel a, chawlhniah Australian Ashleigh Barty nen fourth round-ah an intum ang.

Ninganiah Williams chuan awlsam takin Canadian star Eugenie Boukard a hneh a, 6-2 6-2 in a chak. Kum 37 mi Williams hian Grand Slam title la hnem ber Margaret Court-i champion zat vawi 24 tluk turin trophy pakhat chiah a mamawh a, puitlin thei turin an dinhmun a siam sang zel.

Third round-ah Ukrainian Dayana Yastremska nen an inkhel dawn a, a khelh chhoh danah champion tura rin a hlawh telh telh a ni.

World number one Halep chuan American Sofia Kenin-i lakah inkhel hahthlak tak a hmachhawn a, set thum an inbeih hnuah 6-3 6-7 6-4 in a tlang.

Kum 27 mi Halep hian third round-ah Grand Slam-a vawi sarih champion tawh Venus Williams a tum dawn a, nikum khan French Open-ah champion-in rei tak chhung mi mala harsatna a neih a su kiang a, Grand Slam-ah a vawi khat nan a champion a ni.

Garbine Muguruza chuan British number one Johanna Konta hnehin third round a lut bawk a, a tir atangin inhnehtawk hle mah se 6-4 6-7 7-5 in a chak.

Grand Slam-a vawi hnih champion tawh kum 25 mi Muguruza hi darkar hnih leh minute 42 chhungin a chak a, kum 27 mi Konta a tlak rualin mipa leh hmeichhe singles-ah British player an tla kim chiah a ni.

Share post:
avatar
  Subscribe  
Notify of