Australian Open-ah No. 1 Djokovic-an rin a kai

Australian Open-ah No. 1 Djokovic-an rin a kai

LUNGLEN SPORTS
World number one Novak Djokovic chuan Australian Open first round-ah Mitchell Krueger a tum dawn a, kar leh thawhtanni atangin tournament tan a ni ang.

Djokovic hian a vawi sarih nan Australian Open champion nih tumin Melbourne Park-ah kum khata Grand Slam tournament hmasa ber a khel dawn a, Krueger hneha second round a lut a nih chuan Jo-Wilfried Tsonga nen an insu thei dawn a ni.

Kum kal ta khan Djokovic-an rin phak bakin hma a sawn a, kum tirah talbuaiin June thlengin world ranking-ah a sang 20 zingah a tel pha lo. Mahse, Wimbledon leh US Open-ah a champion a, world number one ni chungin kum a khar a ni.

Grand Slam tournament pali zinga a hlawhtlinna ber Australian Open-ah Djokovic chuan rin a hlawh a, chutih laiin round tir lamah fiahna tling inkhel a hmachhawn thei dawn a, he tournament-a final lut tawh Frenchman Tsonga nen second round intum thei tura tih an ni.

Champion lai leh Grand Slam title 20 kawl mek Roger Federer chuan a vawi sarih nan Australian Open champion nih tumin a khel dawn bawk a, first round-ah world number 99 Denis Istomin nen an intum ang a, semifinal-ah Rafael Nadal nen an insu thei dawn bawk.

Second seed Nadal chuan khawtual player James Duckworth tumin bul a tan dawn a, tunhnaiah hliamin tibuai mah se tha taka khelh tumin a inbuatsaih a, a vawi hnih nan Australian Open trophy lak a tum ve thung.

Fourth seed Alexander Zverev chuan a vawi khat nan Grand Slam champion nih tumin a khel dawn a, first round-ah Slovenian Aljaz Bedene a tum dawn. Nikuma pahnihna Marin Cilic erawh chuan Australian Bernard Tomic a sut nghal a ngai dawn a, a nem lo viau tura ngaih a ni.

Hliam vanga inkhel mumal lo tak Andy Murray chuan 22nd seed Spaniard Roberto Bautista Agut a su nghal dawn a, vawi thum Grand Slam-a champion tawh Murray-a hmabak a hautak nghal hle dawn a ni.

Australian Open hi kar leh thawhtanniah tanin January 27-ah khelh zawh a ni ang.

Share post:
avatar
  Subscribe  
Notify of