Australian Open 1st rd: Williams unau an tlang, Azarenka a tla

Australian Open 1st rd: Williams unau an tlang, Azarenka a tla

LUNGLEN SPORTS
Serena Williams leh Venus Williams chuan Australian Open second round an lut a, champion tawh Victoria Azarenka erawh Laura Siegemund hneh lovin a tla nghal.

Kum 37 mi Serena chuan minute 49 chhungin Tatjana Maria a hneh a, 6-0 6-2 in a chak. 2017 khan nau pai chungin Australian Open-ah Serena a champion a, Grand Slam singles title 23 a lakna leh a champion hnuhnun ber a ni.

Serena hi open-a tennis kalpui a nih atanga Grand Slam singles-a champion hnem ber ni mah se tennis chanchina Grand Slam trophy la zing ber Margaret Court-i champion zat vawi 24 tluk turin title pakhat a la mamawh a ni.

A u Venus chuan harsa takin first round-ah 6-7 7-6 6-2 in Mihaela Buzarnescu a hneh ve thung a, kum 38 mi American hian a vawi riat nan Grand Slam title beiseiin bul a tan a, inkhel hahthlak tak hmachhawn mah se tournament pumpui atan inbuatsaihna tha tak a nih ngei a ring a ni.

Inkhel dangah world number one hlui leh Australian Open-a vawi hnih champion tawh Azarenka chuan set hmasa ber la mah se harsatna a tawk a, 6-7 6-4, 6-2 in German Siegemund chuan a hneh.

Azarenka hian fapa Leo a neih hnuin khelmualah a kir leh a, 2006 khan a vawi khat nan Australian Open khelin first round-ah a tla a, tun hi second round lut pha lova a tlak leh hmasak ber a ni.

British chhuanvawr Johanna Konta erawh chuan second round a lut a, khawtual player Ajla Tomljanovic nen set thum an inkhelh hnuah 7-6 2-6 7-6 in a chak a ni. British number one Konta hian second round-ah Grand Slam-a vawi hnih champion tawh Garbine Muguruza a tum dawn a ni.

Share post:
avatar
  Subscribe  
Notify of