Australian Open 1st rd : Federer a tlang, Murray a tla

Australian Open 1st rd : Federer a tlang, Murray a tla

LUNGLEN SPORTS
Champion lai Roger Federer chuan set hloh lovin Australian Open second round a lut a, Andy Murray erawh Roberto Bautista Agut nen set nga an inkhelh hnuah a tla.

Melbourne Park-a vawi ruk trophy la tawh Federer chuan 6-3 6-4 6-4 in first round-a a tumpui Denis Istomin a hneh a, Britishg player Dan Evans nen an intum leh dawn a ni.

Kum 37 mi hian vawi thum a zawna Australian Open champion ni thei turin fuh takin bul a tan a, a khelh danah a hlim a, a theihna tha ber a lantir thei niin a sawi bawk.

Tournament tan hmain world number one hlui Murray chuan hliamin a kiansan tak tak loh avangin Australian Open hi a hun hnuhnung a hmanna a ni maithei tih a sawi a, ngaihven a hlawh hle.

First round-ah tunlaia che tha tak Bautista Agut nen an intum a, set hmasa pahnih a lak hnuin tha takin a bei let a, mahse, set nganaah tlo zui zo lovin Bautista Agut chuan 6-4 6-4 6-7 6-7 6-2 in a hneh a ni.

Kum 31 mi Murray hian a hma lam hunah thutlukna la siam lo mah se a hun tawp a ni maithei tih a sawi a, a inkhelh hnuhnun ber tur a nih pawhin a tawp dan a ropui hle dawn a, a chhan chu a theihna zawng zawng a hlan niin a sawi.

Inkhel dangah ninth seed Kei Nishikori a tlang hram a, set hmasa pahnih a hloh hnuah chiang takin set thumna a la a, hliam vangin a tumpui Kamil Majchrzak a inhnukdawk a ni.

Majchrzak hian 6-3 7-6 in set hnih a la zawn nghal a, Nishikori insiam remin 6-0 in a la ve leh. Derthawng taka a chak hnuah Japanese Nishikori hian second round-ah Ivo Karlovic a tum ang.

Share post:
avatar
  Subscribe  
Notify of