Asian Cup, zanin 9:30 : UAE v India

Jeje Lalpekhlua telna India-in fuh takin Asian Cup-ah bul an tan a, beiseina sang tak nen zanin dar 9:30 atangin tournament thlengtu United Arab Emirates nen an inkhel.

India hian group stage an khelh hmasak berah Thailand tumin 4-1 in an chak a, captain Sunil Chhetri chuan vawi hnih a khung bakah Mizo striker Jeje-an a vawi khat nan Asia khawmualpuia hrang hrang hrang football inelna sang berah goal a khung a, kum 55 chhunga Asian Cup-a India-in hnehna a chan hmasak ber a ni bawk.

Thailand team-ah hian Asia khawmualpuia league sang ber pawl J-League khel thei player pathum an awm a, chuti chungin Stephen Constantine-a team-in si thum ngawtin an hneh a, beisei phak bakin bul an tan tha a ni.

World ranking-ah India-in 97-na a luah mek a, 79-naah UAE awmin a sang zawk a, vawi 11 an inkhelh tawhah tum riat UAE chakin vawi hnih chiah India-in hnehna a la chang ve a, tum khat an inhnehtawk a ni.

India coach Constantine chuan Thailand hmaah a player-ten khel tha hle mah se ngaih that zui chi a ni lo va, player naupang tak tak awm khawmna team an nih avangin an phur tlang em em a, chutih laiin tournament thlengtu UAE lakah chet a awlsam dawn lo. Team tha an ni a, sut an hautak dawn hle a ni, a ti.

India hian UAE a hneh a nih chuan team dang dinhmun a zirin knockout round a lut nghal thei dawn a, UAE hian an khelh hmasak berah point thum thawk chhuak zo lovin Bahrain nen an inhnehtawk a ni.

Share post:
avatar
  Subscribe  
Notify of