Asian Cup : India huaisen takin UAE lakah an tlawm

Asian Cup : India huaisen takin UAE lakah an tlawm

LUNGPEN SPORTS
Ningani zan Asian Cup-ah goal thun harsat India a tlawm a, si hnih faiin tournament thlengtu United Arab Emirates an chak a, an group-ah hma an hruai zui nghal.

India-in fuh takin tournament bul a tan a, 4-1 in Thailand lakah a chak tawh. UAE hmaah point khat tal thawk chhuak se knockout round lut thei turin dinhmun tha tak a luah dawn a, mahse, Stephen Constantine-a nauten lehlam goal hmaah harsatna lian tak an tawk a, khung theihna remchang an neih an puitlin lo vek a, goal kham tum hnih an tihper a ni.

UAE-in a hmain Bahrain an inhnehtawkpui tawh a, chak mamawhna sang tak nen an khel. A tir atangin ball an chang tam a, mahse, India-in hlauhawm takin an nawr let fo va, chutih laiin goal an venghim thei a, an him phah.

Minute 41-ah Ali Ahmed Mabkhout-a siamsak atangin Khaflan Mubarak chuan tha takin defender karah a khalh rem a, a pet lut. Si khat faia hma an hruai hnuah nghet takin goal an veng zui zel a, hun pangngai tawp hma minute hnihah Mabkhout chuan mualneitu team chakna tichiangin a thun belh a ni.

India-in Thailand hmaah vawi li khung thei mah se UAE lakah an hriam zui zo lo va, captain Sunil Chhetri chuan hun tha a bawhpelh bakah second half atanga khel Jeje Lalpekhlua pawhin khung theihna remchang hmu mah se a puitlin zo lo.

Ashique Kuruniyan chuan goalkeeper chiah a awm tawh tihin a pet lut lo va, Udanta Singh chuan goal kham pet perin centre-back Sandesh Jhingan chuan a tir lamah uiawm takin a khung lo bawk a ni.

Group A inkhel dangah Thailand-in si khat faiin Bahrain an hneh a, beiseina thar an insiam. Vawi hnih theuh an khelh tawhah UAE-in point li an hmu a, India leh Thailand-in point thum ve ve kawlin Bahrain-in point khat an hlawh chhuak tawh bawk a ni.

Group stage kharnaah India-in Bahrain an tum dawn a, January 14-ah an inkhel ang. UAE leh Thailand an intum ve dawn bawk a ni.

Share post:
avatar
  Subscribe  
Notify of