Asian Cup football: India 4-1 Thailand

Sunil Chhetri leh Jeje Lalpekhlua’n India team tanpuiin fuh takin Asian Cup-ah bul an tan a, chawlhniah Al Nahyan Stadium, Abu Dhabi-ah 4-1 in Thailand an hneh.

Asia khawmualpui ram hrang hrang football-a an inelna sang berah beisei phak bakin India-in an khel tha a, captain Chhetri chuan vawi hnih thunin Mizo striker Jeje-a’n goal hnuhnung ber a pet lut bawk a, 1986 Merdeka Cup hnua Thailand lakah India-in hnehna a chan hmasak ber niin knockout round lut thei turin rahbi a tuk nghal a ni.

Minute 27-ah Ashique Kuruniyan-a ball siam luh chu Thailand defender Theerathon chuan a kutin a dang a, penalty a chawi. Chhetri chuan a chhuih lut.

Ball chang tam zawk Thailand-in minute nga hnuah an si phurh an sut a, freekick an pet atangin Teerasil Dangda chuan a tauh lut a ni.

Second half tan atanga minute khatah Chhetri chuan tha zetin a chhuih lut leh a, kum 34 mi hian India tan goal 67 a tihluhna niin player ni mek zinga ram tana khung hnem ber dawttu a ni a, Argentina tana vawi 65 thun tawh Lionel Messi a khum a ni.

Hlauhawm takin India-in an nawr zui zel a, Chhetri hian hattrick siam teuh hle mah se Thai goalkeeper Bootprom chuan a dansak. Mahse, minute 68-ah nalh takin India-in Thai tlar hnung an thiat a, Anirudh Thapa chuan fuh zetin a hmawr a bawk a, ram tan goal a khung hmasak ber a ni.

Hun pangngai tawp hma minute 10-ah substitute Jeje-an India chakna tichiang lehzualin ball a lak rem hnuah rang takin a chhuih lut a, Asian Cup a khelh hmasak berah Mizo tlangval hian goal a thun nghal a ni.

Group A-ah team pali an awm a, vawi khat theuh khelh tawhin India a sang ber a, inkhel dangah 1-1 in tournament thlengtu United Arab Emirates leh Bahrain an inhnehtawk a ni.

Ninganiah India-in tournament thlengtu UAE a hmachhawn zui leh nghal dawn a, zan dar 9:30 atangin an khel tan ang.

Share post:
avatar
  Subscribe  
Notify of