Asia Cup group stage-ah India a tla, bultan that hmang tangkai thei lo

Asian Cup : India huaisen takin UAE lakah an tlawm

LUNGLEN SPORTS
India-in hun tawp dawnah goal an chhuah a, thawhtanni zanah Bahrain lakah si khat faia an tlawm hnuin Asian Cup knockout round lut pha lovin an tla.

India tan inhnehtawk a tawk a, a tir atangin chak mamawh Bahrain lakah bet zawk hle mah se minute 90 an inkhel thlengin goal awm lovin an inhnehtawk.

Mahse, India captain Pronay Halder chuan fimkhur tawk lovin penalty a chawi a, minute 91-ah Jamal Rashed chuan chhuih lutin an group-a hniam ber ni chunga khel Bahrain-in hlim takin hun tawp an hmang a, round of 16 an inhlangkai.

India-in a vawi khat nan knockout round an lut teuh hle a, hun tawp hma lawka an chet sual avangin lungchhe takin khelmual an chhuahsan ve thung a ni.

1964 atangin Asia khawmualpui ram hrang hrangte football-a an inelna sang ber Asia Cup tan a ni a, a tirah ram pali chiahin an khel a, tun hi India a tel vawi lina a ni.

Group stage awma ram tam zawkin an khelh hnuah India-in vawi khat mah knockout round a la lut ngai lo va, 1984 khan first round-ah tlain 2011 khan vawi thum a khelhah chiang takin a tlawm vek a ni.

Tun tumah fuh takin bul a tan a, Thailand lakah 1-4 in a chak nghal. Mahse, tournament thlengtu UAE hmaah si hnih faiin a tlawm a, inkhel pawimawhah Bahrain ngam lovin a tlawm zui leh a ni.

Inkhel dangah 1-1 in UAE leh Thailand an inhnehtawk a, vawi thum theuh an khelhah UAE-in point nga hmuin an tlang a, Bahrain leh Thailand-in point li ve ve hmuin knockout stage an thleng bawk a, India-in point thum chiah hmuin Group A-a hniam ber ni chungin a tla ta a ni.

India coach Stephen Constantine chuan a hna a bansan ve nghal. Kum 56 mi Englishman hian 2015 atangin a vawi hnih nan India team a enkawl a, kawng hrang hrangah hma a sawnpui hle laiin uiawm taka group stage atanga an tlak hnuin India coach atangin a bang tih a puang a, a tihtheih tawk a thleng tawh nia a hriat thu a sawi.

Share post:
avatar
  Subscribe  
Notify of