Anthurium Fest chief minister Zoramthanga’n hawng

Anthurium Fest chief minister Zoramthanga'n hawng

LUNGLEN BUREAU, Aizawl 4th Oct
Vawiin khan Chief Minister Pu Zoramthanga chuan Reiek Tourist Resort-ah ni hnih awh tur Anthurium Festival 2019 chu a hawng. He festival, Tourism Department buatsaih hi Ministry of Tourism atang a cheng nuai 25 state in a hmuh hmanga buatsaih a ni. Vawiin hian Art & Culture Minister Pu R. Lalzirliana, FCS&CA Minister Pu K. Lalrinliana leh Tourism Minister Pu Robert Romawia Royte te an tel a ni.

Chief Minister chuan Mizoram ngeih em em mai leh state dangte pawn an hmelhriat tak Anthurium leh tourism kaikawp a Anthurium Kutpui buatsaih a ni chu lawmawm a tih thu leh khualzin tam tawk he kut hian a hip chhoh zel a beisei thu a sawi a. India hmarchhak chauh nilo ram pum huap in Mizoram chu Anthurium neitu nihna neih tum tura hma lak chhunzawm leh, anthurium hmanga sumdawnna chu nasa zawka a than theih nan a hmalak chhunzawm zel a duh thu a sawi. Chief Minister chuan tourism lama Mizoram vanneihna sawiin, cheibawl chawp leh siamchawp nilo in, kan ramngaw te leh boruak hi ramdangmi hiptu a ni a ti a. “Kan hriatloh hian kan boruak thianghlim, sik leh sa nuam tak takte hi khawvelah a man a to chho zel a, heng hmun thengthaw nuam tak kan neihte hi hmu tura rawn kal chak an tam phah zel ang” a ti. Hemi a nih avang hian khualzin tam zawk dawngsawng a dawlzo thei tura inbuatsaih a tul thu sawiin Pu Zoramthanga chuan kawng tha zawk te, thlawhna tumhmun siamthat a tihchangtlung zawk te chu sawrkarin a ngaipawimawh thu a sawi a. Bungraw phur chi thlawhna dawlzo thei tura airport siam tura project siam a nih thu sawiin, hemi hi a hlawhtlin theih chuan kan pangpar tharte awlsam zawkin khawvel zau zawkah kan hralhchhuah zung zung thei dawn a ni, a ti.

Tourism Minister Pu Robert Romawia Royte chuan Anthurium Festival pianna hmun Reiek ah ngei vawiin a kut buatsaih a ni leh thei chu lawmawm a ti a. Hmanni lawk Gandhi piancham lawm naah khaw fai thlanna a Mamit district chhunga khaw fai ber lawmman an dawn chu Reiek khaw mipuite a lawmpui thu a sawi. Tourism Minister chuan sawrkarin khualzin tam zawk hip tura nasa taka hmalak a nih thu leh project thar te pawh siam a nih zel thu a sawi a. Kut chhimtute chu hun hlimawm tak hmang turin a sawm.

Chief Secretary Pu Lalnunmawia Chuaungo chuan thu sawi bawkin, Reiek chu khaw nuam leh fai, khualzin hip kawngah pawh miin an pan chak ber zing ami a nih thu a sawi a. Faina kawnga an hmalakna te chu fakawm tiin, hmasawn zel tum tura fuihin, Asia khawmualpui ah pawh a fai ber an nih theih tur thu a sawi. Chief Secretary chuan khualzinte dawnsawn kawngah riahna tur indaihloh theih a nih thin avangin ram danga an tih thin, Mizoramah pawh khawchhak hmun thenkhata an lo kalpui tawh thin Homestay – mimal ina man chawia khualzinte riahna tur buatsaih sak chu uar deuh deuh tha a a hriat thu a sawi bawk.

Anthurium Fest chief minister Zoramthanga'n hawng 1
Chief minister Zoramthanga
Kumin Anthurium Festival ni khatna hi Tourism Secretary Pi Esther Lal Ruatkimi chuan kaihruaiin, naktuk (5.10.2019) hian chhunzawm leh niin Tourism Minister Pu Robert Romawia Royte chu khuallian a ni ang a. He festival ah hian zai, lam, lemchan leh thiam thil hrang hrang entir a ni. Anthurium Kutpui ah hian Zo Anthurium Grower’s Society ten Anthurium chi hrang hrang lei theih tura phochhuak in, Mizo Typical Village en tur buatsaih a nih bakah intihlimna hrang hrang te siamin, handloom leh handicraft te, ei siam chi hrang hrang lei theih a chhawp chhuah a ni bawk.

Mizo Rifle Association ten Rifle Shooting an huaihawt a, Zorbing leh Mini-Golf te, Ziplining te, leh naupang intihhlimna chi hrang hrang buatsaih a ni a.Fire & Emergency Services ten Demonstration an nei a. RBI chuan he kut chhung hian stall siam in, pawisa note hlui leh chhia te awlsam taka thleng theih a ni.

Anthurium Festival hi Tourism Minister kaihhruaina hnuaia Organizing Committee din in ruahmanna a siam anga kalpuia ni a. Kum 2006 atang khan buatsaih thin niin kum 2014 thleng Reiek tourist resort ah neih a ni a, kum 2015 khan Lengpui ah neih niin kum 2016 khan Reiek ah buatsaih leh a ni. Kum 2017 leh 2018 khan buatsaih a ni tak loh hnu in kumin hian he festival hi chhunzawm leh a ni.

Festival hawnna inkhawmah hian Adviser to CM Pu C. Lalramzauva, Addl. Chief Secretary Pu J.C. Ramthanga leh official dangten Chief Minister hi an tawiawm a ni.

Share post:
avatar
  Subscribe  
Notify of