An district chhunga sorkar hmalakte enin Serchhip MJA member 7 an feh chhuak

An district chhunga sorkar hmalakte enin Serchhip MJA member 7 an feh chhuak

LUNGLEN BUREAU
Aizawl, October 3, 2018
Serchhip district-a MJA member 7 chuan NEDP Multimedia Publicity Campaign hmalakna kal zelah an district chhehvela sorkar hmalakna thenkhatte tlawh kualin vawiin khan K.Saitluanga, Serchhip, IPRO hovin an zin chhuak a. Biate leh East Lungdar an tlawh hnuah naktuk hian North Vanlaiphai an pan leh ang.

MJA Tour hian vawiin khan Biate panin an khaw tana tuilak hna PHE, Serchhip WATSAN Division kaltlanga thawh mek an en a. He tuilak hi Tuipui lui pump tura hmalakna niin Rs. Nuai 1364.67 senna tur, NERDP sum hmanga thawh a ni. Kum 2015 atanga chhuta kum 30 chhung ni tin mi pakhat tana tui litre 135 dawng thei tura chhut a ni a. Contractor H.Sanga, Aizawl Chanmari a ni a, hna hi 50% vel thawh zawh tawh nia sawi a ni. Tuipui leh Biate tlang tui dahkhawlna tur hmun insan hleih zawng hi 960 mtrs niin, a hlat zawng hi 6.7 kms a ni. Ni tin darkar 20 pump theih tura ruahman niin June, 2019-ah hna hi zawh hman tura ruahman a ni.

Hemi zawh hian Biate khawtlang hruaitute nen inkawmna nei zui nghalin faina lama khawtlangin hma an lak dan inhrilhhriatna, inkawmhona neih a ni a. Biate VCP R.V.Hluna’n inkawmhona hi kaihruaiin Village Council member te, YMA, MHIP, MUP leh MZP bakah Biate khawtlangin faina lama Brand Ambassador pathumte an tel a. Biatein tunhma atanga faina lama hma an lo lak tawh dan leh an hmachhawp hrang hrangte sawiho.

Biate hi nikuma Mizorama khawpui fai inelnaah 1-na an nih hnuah kumin inelna, nimina result puanah pawh 1-na an la leh bawk.

Biatea hun an hman zawh hian East Lungdarah SDO, PHE, East Lungdar Samuel L.R.Ralte hovin East Lungdar Multi Village Water Supply Scheme hmalak tur ruahmanna te sawihona hun an hmang leh a, tlaiah North Vanlaiphai panin naktuk hian North Vanlaiphaia Agriculture Department hmalakna an en leh ang.

Biate leh East Lungdara PHE Department hmalakna an enkualna hi V.Lalvuana, JE, PHE, East Lungdar Sub Division-in a lo dawngsawng a ni.

Share post:
avatar
  Subscribe  
Notify of