Aizawl FC head coach thar Standly Rozario

Indian Arrows laka an tlawm hnuah Gift Raikhan chuan Aizawl FC head coach a nihna a bansan a, a aiawh turin Mizo club-in Standly Rozario an ruai zui nghal.

Kar hmasa inrinni khan Aizawlin Arrows mikhualin si khat faiin an hneh lo va, I-League kal mekah vawi 11 khel tawhin a tum ruk nan an tlawm a, point kua hmuin team 11 inel zingah 10-na an luah mek.

Manipuri coach Rakhan chuan I-League season tir atangin Mizo club a kaihruai a, beisei pha lo taka season chaw hnu thlenga hun a hmanpui hnuin a nihna atangin a inhnukdawk.

Aizawlin AFC Pro license nei Rozario an ruai zui nghal a, ani hi Indian football-a tawn hriat nei tha tak niin East Bengal, Mohun Bagan, Salgaocar leh Shillong Lajong a enkawl tawh a, team tan phurna thar a siamsak a, kawng dikah a kirpui ngei an beisei tih thuchhuah siamin Aizawl-in an tar lang.

Mizo club hian naktukah Real Kashmir mikhualin I-League inkhel pawimawh tak an hmachhawn dawn a, kum 58 mi Rozario chuan team a la kaihruai hman lo va, vawiinah team zawm chauhin assistant coach Jonathan-a hovin Mizo team-in an khel dawn a, Rajiv Gandhi Stadium, Mualpuiah tlai dar 2 atangin an khel tan dawn a ni.

Season chaw hma lamah kai thar Real Kashmir hian Aizawl mikhual tawhin si khat faiin an hneh a, naktukah Mizo club-in Mizo leilungah Kashmir laka an tlawm tawhna chhan let tumin an khel dawn a, Rozario-an a hmunah inkhel a en dawn a, assistant coach Jonathan-a chuan point thum an hmuh theih a pawimawhzia leh an head coach thar hmuh laia an thawh chhuah ngei a beiseizia a sawi a ni.

Share post:
avatar
  Subscribe  
Notify of