A vawi khat nan Australia-ah India-in Test series a la

A vawi khat nan Australia-ah India-in Test series a la

Ruahsur avangin Test vawi lina khel zo thei lovin inhnehtawk mah se India-in a vawi khat nan Australian leilungah Test series a la a, 2-1 in mualneitu team lakah a chak.

Vawiinah inkhel tihtawp a ni a, hetih lai hian Australia-in run 316-in India run siam khawl sa a la pha lo va, chuti chungin Test vawi linaah inhnehtawka puan an ni.

Mahse, a hmaa vawi thum an lo khelh tawhah mikhual India-in Adelaide leh Melbourne-ah hnehna a chang a, 1947-48 atanga Australia tlawha inkhel a hmachhawn tawhah tun hi Test series a lak hmasak ber a nih bakah Virat Kohli chu India leh Asian team captain ni chunga Australian leilunga Test series la hmasa ber a ni nghal bawk.

Test vawi linaah hian India-in thawk hmasain 622 a siam tihin wicket sarih a hloh a, duhtawkin Australia-in an thawk ve leh a, run 300 siamin wicket an hloh zo vek. Run 200 chuangin India an phak loh avangin an thawk nawn leh nghal a, run ruk chiah siamin wicket an la hloh lo tihin ruahsurin a tibuai a, chak zawk awm lovin tihtawp a ni ta a ni.

India team tan hnehna chhinchhiahtlak a ni a, Kohli chuan tun ang hian a la inchuang ngai lo tih a sawi a, a hlawhtlinna chan tawha lian ber leh sang ber a nih thu a sawi bawk a ni.

A vawi khat nan Adelaide-ah an inkhel a, run 31-in mikhual team an chak a, Chateshwar Pujara chuan inning hmasaah century siamin 123 a hlap a, inning hnihnaah 71 a siam bawk.

Perth-ah Australia-in chhang letin run 146-in hnehna an chang a, mahse, an inkhelh vawi thumna Melbourne-ah Pujara chuan century siam lehin India a chakpui a ni.

Sydney-ah hun hnuhnun an hmang a, man-of-the-series Pujara chuan 193 hlapin vawi li an inkhelhah tum thum century a siam a, Ribash Pant chuan 159 a thawk chhuak bawk.

A tir atangin India-in inkhel an thunun tha hle a, ruahsur vangin hnehna chang zo lo mah se hlawhtling takin series an khar a ni.

Share post:
avatar
  Subscribe  
Notify of