2019 kum tawpah KMMTTP zawh beisei; company-te hnathawk thei lovin ni 360 dang tawh

2019 kum tawpah KMMTTP zawh beisei; company-te hnathawk thei lovin ni 360 dang tawh

LUNGLEN BUREAU
Aizawl, August 24, 2018
October 10, 2010-a hna thawh tan, Kaladan Multi Modal Transit Transport Project (KMMTTP) hnuaia Lawngtlai atanga Myanmar ram pawh tur kawngpui sial mek chu 75.06% zawh ni tawhin, KMMTTP hi kum 2019 kumtawpah zawh theih beisei a ni. Hetihlai hian KMMTTP bul tan a nih atanga vawiin thlengin hnathawktu company-te hnathawk thei lova dan an nih tawh zat belhkhawm chu ni 360 a tling tawh.

Mizorama project thawh mek zinga pawimawh bera chhal ngam, KMMTTP hnuaia Mizoram chhunga kawngpui kal tur hi km 99.83-a thui niin, package thum (3)-ah then a ni a. Package I hi km 0-38 niin, RDS Company-in an thawk a. Package II hi km 38-71 niin Atlanta-ARSS Company-in an thawk thung a. Package III hi km 71-99.83 niin RDS bawkin an thawk.

Hnathawh bul tan kum 2010 atanga vawiin thlengin heng hnathawktu company hnathawk thei lova dan an nih tawh zat belhkhawm chu ni 360 zet a tling tawh a, ram neituten zangnadawmna phuta an lungawina ang an hmuh loh vangin Lawngtlai District Land Owner Association chuan company-te hi hnathawk thei lovin an dang thin a ni.
Mizoram PWD hotute sawi danin, KMMTTP hnathawh mek hi 75.6% zawh a ni tawh a, harsatna a thlen lohva tluang taka thawh theih a nih chuan kum 2019 kum tawp lamah zawhfel theih beisei a ni.

Ministry of Road Transport & Highway kaltlanga Mizoram PWD-te vilna hnuaia kawngpui sial mek, KMMTTP hi a tira sum sen tura ruahman chu Rs. Vbc 677.20 a ni a, tum hnih ennawn tawh niin, tuna senso tur ruahman zat chu Rs. Vbc 1011.52 a ni a. Kum 2010 hnathawh bultan a nih dawn a hnathawh zawh hun tur bituk chu kum 2014 a ni a; amaherawhchu, chhan hrang hrang vangin hnathawh zawh hun turah zawh theih a ni lo va, ruahmanna tharah Package I leh II chu June 30, 2018 hmaa zawh tur a tih niin, Myanmar ramri lam dep, Package 3 chu December 31, 2018-a zo tura tih a ni.

Kawngpui sialtu, RDS Project Ltd. leh Atlanta ARSS (joint venture) hotute sawi danin kawng sialnaah hian hmun eng emaw zatah lei nghet lo a awm a, leimin a nasat avangin hna thawh a sawt loh bakah ruahtui tam lutukin hmalakna a tithuanawp deuh thin a. Kawngpui km. 87.91-a thuiah hian lei (bridge) pariat dawh tur niin culvert 428 siam tur a awm a, kawngpui blacktop chu metres 7-a zim lo tur niin, lei atanga blacktop chung ber thlenga a chhah zawng chu ft. 2.16 tur a ni.

Share post:
avatar
  Subscribe  
Notify of