2018-19 chhungin Tlawva leh Kawlbem Small Hydel Project peih fel tum

2018-19 chhungin Tlawva leh Kawlbem Small Hydel Project peih fel tum

LUNGLEN BUREAU
Aizawl, October 3, 2018
PWD, I&PR leh Health changtu Minister Lal Thanzara chuan vawiina Khawbunga 33 kV Sub Station a hawnnaah thu sawiin Tlawva Small Hydel Project chu sorkar kum 2018-19 chhung leh Megawatt 5 pe chhuak thei, Kawlbem Small Hydel Project pawh kum 2019 chhunga peihfel tum a nih thu a sawi.

Lal Thanzara chuan kawlphetha lama intodelh chu sorkar ngaih pawimawh berte zinga mi a nih avangin theihtawp chhuahin hma lak mek a nih thu a sawi a. Megawatt 4 pechhuak thei tur, Tlawva Small Hydel Project hi kum 2018-19 chhunga zawh beisei a nih thu leh hei hian East Tuipui bial khaw hrang hrangte tan power lamah hmasawnna nasa tak a thlen dawn thu a sawi.

PWD Minister chuan Kawlbem Small Hydel Project kum 2019 chhunga peih hman tum a nih thu leh 25 MW pechhuak thei, Tuirini Hydel Project chu BRICS Bank atanga loan laka khuah tum a nih thu a sawi bawk a. Nizung hmanga kawlphetha siam chhuahna tur, Vankalah Solar Park dah tura ruahmanna a kal mek thu a sawi bawk.

Minister hian World Bank Project hnuaia POWERGRID-in West Phaileng, Marpara leh Lungsena Sub Station thar sak mek te; Khawiva 132 kV Substation tihlen tum te; West Phaileng to Marpara leh Lungsen to Chawngte to South Bungtlang-ah 132 kV line thar siam a nih tur thu te; South Bungtlangah Sub-Station dah tur chungchang te pawh Minister hian a sawi tel a. Power & Electricity Department hnuaiah Melriat to Lunglei line hna chu sorkar kum 2018-2019 chhunga peihfel tum a nih thu a sawi bawk.

East Tuipui bialtu MLA T.Sangkunga pawhin thu sawiin Khawbung 33/11kV Sub Station hawn a ni ta chu a chhawr tangkai thei tur Khawbung leh a chhehvel Dungtlang, Samthang, Zawlsei leh Khuangthing tan ni chhinchiahtlak tak leh hmasawnna kawnga rahbi thar an kaina ni pawimawh a nih thu a sawi a. Bialtu MLA a nih anga lawmawm a tihzia sawiin, “East Tuipui bial chhungah sorkarin hmasawnna hna kawng hrang hrangin a thawk tawh a, a thawk zel dawn,” a ti.

Khawbung 33/11 KV Sub-Station hi State Plan Assistance atangin Rs. Nuai 397.25 senga siam a ni a. A line thui zawng 33 KV Khuangleng Sub-Station to Khawbung 33 KV Sub Station hi kilometre 30 a ni.

Hawnna inkhawm hi Power & Electricity Department Engineer-in-Chief Lalramliana’n a kaihruai a. J.Lalhmachhuana, EE, Power Project Division, Champhaiin technical report a pe.

Share post:
avatar
  Subscribe  
Notify of